Bikozwe mu gihe u Rwanda rukomeje kwegereza amashanyarazi abaturage hamwe no gukuraho icyuho cy’amashanyarazi acika bya hato na hato.

U Rwanda rwiyemeje ko bitarenze umwaka wa 2024, ingo zose 100% zizaba zifite amashanyarazi, inganda ziyatunganya zikiyongera ku buryo ingano yayo iba ijyanye n’iterambere Igihugu kigezeho, ndetse n’imiyoboro iyakwirakwiza ikongererwa imbaraga ku buryo nta mashanyarazi yongera gutakara cyangwa ngo acikagurike bya hato na hato.

Iyi gahunda izafasha u Rwanda gutera imbere ruhereye ku miyoboro ijyana amashanyarazi mu bice bitandukanye by’Igihugu ndetse n’iyakwirakwiza mu baturage.

Mu Rwanda ingo zifite amashanyarazi zibarirwa kuri 68.48%. Icyakora kuva mu mwaka wa 2014, binyuze mu muryango Enabel, u Bubiligi bwagiye butera inkunga imishinga myinshi yo guteza imbere ingufu mu Rwanda harimo iyo gukwirakwiza amashanyarazi ndetse no kwagura imiyoboro yayo.

Iyo mishinga ikubiye mu nkunga ingana na Miliyoni 39 z’Amayero yashyizwe muri gahunda yo gukwirakwiza amashanyarazi yibanze mu rwego rwo kongera umubare w’abagerwaho n’amashanyarazi ndetse no kurushaho kunoza imitangire yayo ku ngo ndetse n’ibigo bya Leta mu gihugu.

Inkunga y’Ubwami bw’Ababiligi yatumye ibirometero 1000 by’imiyoboro mishya y’amashanyarazi byubakwa ndetse ingo 50,000 zihabwa amashanyarazi afatiye ku muyoboro rusange mu Ntara y’Iburasirazuba.

Igice cya nyuma cy’uyu mushinga cyibanze ku kuvugurura no kongerera imbaraga imiyoboro y’amashanyarazi yubatswe kera mu Ntara y’Iburasirazuba no mu Burengerazuba mu Karere ka Rubavu.

Bert Versmessen, Ambasaderi w’u Bubiligi mu Rwanda, avuga ko u Bubiligi butewe ishema no kuba bwaragize uruhare mu guteza imbere ingufu mu Rwanda.

Yagize ati : “Ibirometero bisaga 1,000 by’imiyoboro byarubatswe ibindi byongererwa imbaraga muri uyu mushinga watewe inkunga n’u Bubiligi mu Rwanda. Abaturage basaga 250,000 batari bafite amashanyarazi ubu bayabona neza kandi barayakoresha. Uyu ni umusaruro ufatika werekana ishusho ngari y’ibigenda bigerwaho."

Akomeza avuga ko mu myaka mike ishize, u Rwanda rukomeje gutera intambwe ishimishije mu gukwirakwiza amashanyarazi.

Ati "Leta y’u Bubiligi yishimiye kuba yaragize uruhare muri uru rugendo rushimishije”.

Minisitiri w’Ibikorwa remezo, Dr. Ernest Nsabimana, avuga ko hari byinshi bimaze kugerwaho biturutse ku bufatanye hagati y’ibihugu byombi ndetse ko bukomeje kuba imbarutso y’iterambere ry’ubukungu.

Agira ati: “Iyi mishinga idufasha cyane kugera ku ntego za Leta zijyanye n’iterambere ry’ubukungu. Uyu mushinga ntiwagarukiye ku kongera umubare w’abafite amashanyarazi, ahubwo wanafashije bikomeye mu kuvugurura imiyoboro isanzwe mu Rwanda ndetse no kuyongerera ingufu kugira ngo amashanyarazi agere kuri bose ahagije kandi afite ubuziranenge."

Umushinga wafashije kuvugurura imiyoboro yubatswe mu myaka 30 ishize, yongererwa ubushobozi buva ku kigero cya kilovolute (KV) 6,6 ishyirwa kuri kilovolute 30, hubatswe kabine 20 ndetse zose zishyirwamo imashini (transfomers) ziringaniza ikigero cy’amashanyarazi.

Hubatswe imiyoboro mishya ireshya n’ibirometero 14 by’imiyoboro iringaniye n’ibirometero 34.7 by’imiyoboro mito mu Karere ka Rubavu.

Uyu mushinga wanafashije gushyira amatara yo ku mihanda ibirometero 7.2 mu Murenge wa Gisenyi.