Rubavu: Hari abasenyewe n’imitingito basaba gufashwa kubaka

Abaturage basenyewe n’imitingito yakurikiye iruka ry’ikirunga cya Nyiragongo mu Karere ka Rubavu barasaba gufashwa kubaka amacumbi kuko hari abatarabona aho kuba.

Bishimiye isakaro bagejejweho nubwo bikibagoye kwiyubakira
Bishimiye isakaro bagejejweho nubwo bikibagoye kwiyubakira

Abaturage bo mu Murenge wa Rubavu ako karere babitangaje mu gihe bashyikirizwaga amabati yatanzwe n’umuryango wa Action Aid Rwanda, watanze isakaro ry’amabati 1600 n’imisumari ibiro 250 byo guha abaturage kugira ngo bashobore gusakara inyubako zabo.

Nyirantibibuka Clemantine yabwiye Kigali Today ko kuva umutingito wamusenyera we n’abana badafite aho bikinga imbeho kuko n’ibyo bari batunze byangiritse, avuga ko n’ubwo ahawe amabati azakomeza gutegeraza abagira neza bakamufasha kubaka.

Agira ati “Mbona icyo kurya ari uko naciye inshuro, kandi kubaka bisaba ubushobozi bundenze. Ndashimira Leta ituzirikana, sinabona uko mbashimira kuko ndizera ko ngiye kongera kubona aho gutura ntanyagirwa.”

Uwimana Donatila wahawe amabati avuga ko yari asanzwe anyagirwa ndetse agahora abunza imitima ko imvura imunyagira, ashima kuba yahawe amabati ariko akavuga ko adashobora kwiyubakira, ahubwo ateze ko Leta n’abagira neza bazamufasha kuko asanganywe ubumuga ku kuguru.

Umuyobozi w’Akarere ka Rubavu, Kambogo Ildephonse, avuga ko bakomeje ibikorwa byo gushaka abafatanyabikorwa mu kubonera abaturage aho kuba nyuma yo gusenyerwa n’imitingito.

Kambogo avuga ko bakeneye amabati ibihumbi 100 n’ubwo ubufasha bamaze kubona ari bwo bwinshi bwashyikirijwe abaturage bangirijwe.

Agira ati “Iki ni igikorwa kigizwemo uruhare na Action Aid cyo gufasha abagizweho ingaruka n’imitingito, ariko turacyakeneye amabati ibihumbi 100, gusa n’aya baduhaye 1600 turashima cyane. Dukomeje gukorana n’abandi bafatanyabikorwa kugira ngo tubone isakaro abaturage bashobore kubona aho bashyira umusaya.”

Meya Kambogo avuga ko bizera ko bazabona ubufasha ku miryango itarabona aho kuba kuko n’abahawe amabati na Action Aid bavuga ko badafite ubushobozi bwo kuba.

Uwamariya Irene Josephine uhagarariye Action Aid mu Rwanda, avuga ko batanze isakaro rikurikira ubundi butabazi bakoze muri Gicurasi ubwo imitingito yasenyeraga abaturage, ariko yemeza ko uko ubushobozi buzaboneka bazakomeza gufata abaturage.

Umuryango wa Action Aid uje gufasha abaturage nyuma ya Croix y’u Rouge imaze kubakira imiryango 150 na yo y’abasenyewe n’imitingito.

Raporo y’impuguke za MINEMA igaragaza ko gusana neza ibyangijwe n’imitingito yatewe n’iruka ry’ikirunga cya Nyiragongo tariki 22 Gicurasi 2021, bizatwara inshuro zirenga ebyiri agaciro k’ibyangiritse muri Rubavu, igiciro cyose cy’ibyangiritse kirabarirwa mu Mafaranga y’u Rwanda 36,650,606,000.

Mu nzu zose zituwemo 2,654 zahungabanijwe n’umutingito, 1.920 zaraguye ndetse imiryango 351 irimurwa iracumbikirwa.

Amashuri arindwi yahungabanyijwe n’imitingito agomba kwimurirwa mu tundi turere nyuma yo gufatwa nk’aho adashobora gusanwa.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka