Abatuye muri uyu murenge, bavuga ko uretse aya mafaranga bari baremerewe babuze, ubu ngo n’andi amaze kubashiraho kubera guhora mu ngendo zo kujya ku murenge gukurikirana ingurane yabo.

Bavuga ko batanze ibikorwa by’amajyambere, kuko ngo nabo bakeneye kubaho neza nk’abandi batuye hirya no hino mu gihugu bamaze kugerwaho n’ibikorwa remezo, ariko nanone ngo ibikorwa remezo ntibyasimbuzwa akarengane babona bakorewe.

Nkundabatware Jean d’Amour yarimburiwe imyaka irimo Soya, Imyumbati, Imbingo, Kawa, Insina, ibiti by’imivumu n’indi bifite agiciro ka ngana n’amafaranga ibihumbi 70 ariko ngo amaso yaheze mu kirere.

Ndayisenga Silas nawe utuye Rilima, avuga ko we kuba yarabaruriwe ntahabwe ingurane yemerewe, ngo byamuteye ubukene bukabije kuko umwanya munini awutakaza mu kwiruka kuri aya mafaranga, uyu mugabo akavuga ko nyuma yo gusinya inshuro enye zose ku murenge, ngo ntiyegeze atuza ngo yicare arebe n’ibindi yakwikorera.

Sinzi Francois atuye mu mudugudu wa Buhoro akagari Kimaranzara umurenge wa Rilima, we avuga ko ibi bitamubayeho, ariko ngo hari abaturanyi be byabayeho nk’uwitwa Kabarira Claver kugeza ubu nawe wategereje akaba yarahebye.

Ngo hari n’abantu b’abakecuru badafite ubirukankira inyuma y’iki ikibazo, ugasanga bamwe batazi n’aho babariza ngo kuko baheruka bababwira gufunguza konti muri za banki nk’uko bitangazwa na Habanabakize Fredoire utuye muri uyu murenge wa Rilima.

Gasirabo Gaspard ni umunyamabanga nshingwabikorwa w’umurenge wa Rilima, avuga ko iki kibazo atakizi neza kuko ngo amaze igihe gito atangiye imirimo ye muri uyu murenge. Gusa ngo icyo azi ni uko aba baturage basabwe gufunguza konti mu murenge Sacco ngo bazashyirirweho ingurane yabo bemerewe.

Impamvu y’itinda ry’aya mafaranga

Ubuyobozi bw’akarere ka Bugesera, bwo buvuga ko intandaro y’itinda ry’aya mafaranga yatewe n’abaturage batagiye babonekera igihe kimwe mu gihe cyo gusinya, ngo kuko byagiye bigorana kubahuriza hamwe.

Phocas Nzeyimana ushinzwe ibikorwa remezo mu karere ka Bugesera, avuga ko minisiteri y’ibikorwa remezo ariyo yari ifite mu nshingano zayo kwishyura izi ngurane, ngo ni kenshi bagiye bageza urutonde rw’abagomba kwishyurwa n’iyi minisiteri, ariko ngo kuko urutonde rwabaga rutariho abagombaga kwishyurwa bose, byatumaga minisiteri y’ibikorwa remezo ibasaba gusubiramo ayo ma lisite kugirango abaturage bose bishyurirwe rimwe.

Nzeyimana yagize ati “ twahuye n’ibibazo bikomeye cyane, kuko hari nk’uwo babaruriraga umutungo we ugahwana 500 cyangwa 1000 ntiyirirwe ayakurikirana, undi ukumva ngo yarapfuye kuburyo guhuza lisite y’abagombaga kuyahabwa byatugoye cyane”.

Nzeyimana akomeza avuga ko bitoroshye kumenya umubare w’amafaranga n’umubare w’abantu bagomba kuyahabwa, ngo hafashwe icyemezo cy’uko abiyandikishije uko bangana bose aribo bagiye guhabwa ingurane zabo.

Asoza avuga ko ubu ikibazo cy’aba baturage cyamaze kuva muri minisiteri y’ibikorwa remezo kikaba kiri muri minisiteri y’imari n’igenamigambi nayo icyo ishigaje akaba ari ukohereza aya mafaranga kuri konti z’aba baturage mu gihe gito.

Gusa ngo nubwo iyi miyoboro y’amazi yamaze kunyuzwa mu mirima y’aba baturage hakangizwa imyaka yabo n’ingurane bemerewe ntibayibone, bavuga ko babona ntacyo byabamariye kuko n’ubundi nta mazi bafite bakaba bagikoresha amazi mabi.

Eric Muvara