Ibi babisabwe kuri uyu wa gatatu tariki 30/01/2013 na Prof. Shyaka Anastase, Umuyobozi mukuru w’ikigo cy’igihugu cy’imiyoborere (RGB), aganiriza abanyeshuri, abarimu n’abayobozi muri INES Ruhengeri no muri ISAE Busogo.

Ibiganiro byatangiwe muri aya mashuri makuru n’ibirebana n’imiyoborere myiza, bijyanye n’ukwezi kw’imiyoborere myiza, ndetse abaganiriza no ku butwari n’intwari z’igihugu, mu gihe habura iminsi mike tukizihiza umunsi mukuru w’intwari.

Bamwe mu bitabiriye ibi biganiro bavuze ko ibiganiro baganirijwe byabubatse ndetse binabateramo inyota yo guharanira kurangwa n’ibikorwa by’ubutwari, bigatuma babasha kwihesha agaciro ndetse bukanabageza ku iterambere rirambye.

Nteziryayo Richard, uhagarariye abanyeshuri muri INES Ruhengeri, yavuze ko ibiganiro bahawe bibaremyemo inyota y’ibikorwa by’ubutwari, ndetse bakanubakira ibitekerezo byabo ku bikorwa by’akataraboneka, biganisha ku iterambere.

Prof. Shyaka Anastase, yavuze ko ukwezi kw’imiyoborere myiza kwizihijwe ku nshuro ya kabiri, gufite intego yo kureba uburyo inzego z’imiyoborere zafatanya ngo zihutishe ikemurwa ry’ibibazo by’abaturage ndetse hakaba ibiganiro bigamije kurushanwa.

Muri ibi biganiro kandi abanyeshuri babajije ibibazo birebana n’umunsi w’intwari ndetse n’ukwezi kw’imiyoborere, aho basobanuriwe ko kugirango umuntu ashyirwe mu kiciro runaka cy’intwari harebwa uburyo yitangira abandi, yatekerereje igihugu ndetse n’uburyo yaharaniye izo ndangagaciro kandi akazigeraho.

Jean Noel Mugabo