Perezida Ruto yishimiye uburyo yakiriwe i Nyamata

Yanditswe na

Ernestine Musanabera

6-04-2023 - 10:23' | Ibitekerezo ( 1 )

Perezida William Ruto ubwo yari mu ruzinduko rwe ku munsi wa kabiri mu Rwanda ku wa Gatatu tariki ya 5 Mata 2023 mu Karere ka Bugesera mu mujyi wa Nyamata yishimiye urugwiro yakiranywe n’abaturageakanasangira na bo.

Abinyujije kuri Twitter, Perezida Ruto yatangaje ko yishimiye uburyo yakiriwe n’abaturage muri aka Karere.

Ati “Naganiriye kandi nsangira icyayi n’abakora cyane bashakisha imibereho [Hustlers] muri Calibou Restaurant, iri i Nyamata mu karere ka Bugesera, mu Burasirazuba bw’u Rwanda”.

Perezida Ruto yari kumwe na Minisitiri w’Ububanyi n’Amahanga Dr Vincent Biruta na Minisitiri w’Ububanyi n’Amahanga wa Kenya, Dr Alfred Nganga Mutua hamwe n’abandi bayobozi.

Perezida Ruto yagiye muri iyi Restora iri i Nyamata amaze gusura ibikorwa bitandukanye birimo Ishuri Rikuru ry’Ubuhinzi n’Ubworozi butangiza ibidukikije (Rwanda Institute for Conservation Agriculture, RICA) riri mu murenge wa Gashora, Akagali ka Mwendo, umudugudu wa Gaharwa mu Karere ka Bugesera.

Perezida Ruto yageze i Kigali kuwa Kabiri tariki ya 4 Mata 2023 yakirwa na mugenzi we Paul Kagame, urugendo rwe rukaba rusojwe kuri uyu wa Gatatu.

Urugendo rwe rusize u Rwanda na Kenya bishyize umukozo ku masezerano 10 Ibihugu byombyi byasinyanye amasezerano y’ubufatanye mu nzego zitandukanye, arimo urwego rw’igororero, amahugurwa mu bya dipolomasi, ikoranabuhanga, ubuzima, urubyiruko, iterambere, uburezi, ubuhinzi, uburinganire n’iterambere ry’umuryango.

Kuri uyu mugoroba nibwo Perezida Kagame yasezeye kuri mugenzi we wa Kenya, William Ruto wasoje uruzinduko rw’iminsi ibiri yagiriraga mu Rwanda.