Minisitiri w’ububanyi n’amahanga Louise Mushikiwabo yatangaje ko Perezida Kagame yitabiriye iyi nama k’ubutumire bwa Perezida wa Benin, kugira ngo baganire ku bibazo byugarije Afurika birimo umutekano n’iterambere.

Bizafasha Perezida Boni unayoboye Afurika yunze Ubumwe gutegura gahunda y’ibyo azakora mu mwaka azamara ayyiobora, nk’uko Minisitiri Mushikiwabo yakomeje abitangaza.

Perezida Kagame akigera ku kibuga k’indege cy’i Cotonou, yakirwa na Perezida wa Benin Yayi Boni.

Iyi nama kandi izanibanda ku kibazo cya Sudani na Sudani y’Amajyepfo gishobora kuvamo intambara, nyuma y’igihe gito sudani y’Amajyepfo imaze kwemerwa kwigenga.

Imitwe yivumbuye kuri leta ya Libya nyuma y’ikurwaho rya Gaddafi hamwe n’indi mitwe igaragara muri Afurika nk’iyo muri Uganda nayo izaganirwaho.

Perezida Kagame aganira na bamwe mu bayobozi bitabiriye inama.

Ikindi kibazo kigomba kwiga ni icy’imitwe yitwaje intwaro ikorera mu majyaruguru ya Mali, umutwe w’abayisilamu wa Boko Haram wo muri Nigeria umaze kwigaragaza mu guhungabanya umutekano.

Iyi nama yitabiriwe n’abayobozi b’ibihugu batandukanye birimo Tchad, Congo, Côte d’Ivoire, Afurika y’Epfo, Liberia, Togo, Niger, Gabon, Nigeria na Ethiopia

Sylidio Sebuhahara