KT TV
Perezida Kagame yakiriye Umuyobozi wa ‘Investment Corporation of Dubai’
Perezida Paul Kagame yakiriye muri Village Urugwiro, Umuyobozi mukuru w’ikigo cy’ishoramari, Investment Corporation of Dubai unakuriye ikigo cya Kerzner International, Mohammed Al Shaibani, baganira ku gushimangira ubufatanye hagati y’iki kigo n’Igihugu cy’u Rwanda.
Ubu bufatanye buzakomeza kugira u Rwanda Igihugu cyakira abashyitsi bitabira ibikorwa by’ubukerarugendo, bushingiye ku bidukikije.
Amakuru dukesha Village Urugwiro, avuga ko Perezida Kagame yagiranye ibiganiro na Mohammed Al Shaibani tariki 8 Nzeri mu 2023. Ibi biganiro kandi byanitabiriwe n’Umuyobozi Mukuru w’Urwego rw’Igihugu rw’Iterambere (RDB), Clare Akamanzi.
Uyu mushoramari asanzwe afite ibikorwa mu Rwanda birimo Hotel One&Only Gorilla’s Nest iherereye mu Kinigi na One&Only Nyungwe House.
Izi Hotel ni zimwe mu zifasha ba mukerarugendo kubona amacumbi no kubakira, igihe baje gutembera no kureba ibyiza nyaburanga bitatse u Rwanda.
Mohammed Al Shaibani asanzwe ari Umuyobozi mukuru wa Kerzner International, ikigo cy’ishoramari gifite amahoteli hirya no hino ku Isi. Mu 2014 nibwo Guverinoma ya Dubai yaguze imigabane muri iki kigo.
Mu rwego rwo gukomeza kwagura ibikorwa by’ubukerarugendo, u Rwanda rwaguye amarembo ku bashoramari bifuza gukorera ibikorwa by’ishoramari byabo mu Rwanda.
Ibitekerezo
Ohereza igitekerezo
|
|
