Perezida Kagame yaganiriye na Mushikiwabo na Charles Michel ku bijyanye no gukingira Covid-19

Kuri iki cyumweru Perezida wa Repubulika, Paul Kagame yakiriye Umunyamabanga Mukuru w’Umuryango w’Ibihugu bikoresha Igifaransa (Francophonie), Louise Mushikiwabo hamwe na Perezida w’Inama y’Umuryango w’Ubumwe bw’u Burayi(UE), Charles Michel, bakaba baje gushyigikira u Rwanda ku bijyanye no gukingira Covid-19.

Aba bayobozi b’imiryango mpuzamahanga kandi bari kumwe n’umuganga akaba n’umudepite mu Nteko Ishinga Amategeko y’u Burayi, Chrysoula Zacharopoulou, bakaba bahise bajya ku kigo Nderabuzima cya Mayange mu karere ka Bugesera, kureba uko ibikorwa byo gukingira Covid-19 biri kugenda.

Muri urwo rugendo Mushikiwabo, Michel na Zacharopoulou bari baherekejwe na Minisitiri w’Ubuzima, Dr Daniel Ngamije, ndetse na Minisitiri w’Ububanyi n’Amahanga, Dr Vincent Biruta.

Abo bayobozi bavuga ko basuye u Rwanda mu rwego rwo gushyigikira no gukorera ubuvugizi gahunda yo gutanga inkingo za COVID19, zatanzwe n’Ishami ry’Umuryango w’Abibumbye rishinzwe Ubuzima (OMS) muri gahunda yiswe Covax igamije kuzisaranganya hose ku isi.

Louise Mushikiwabo yagize ati "Twebwe nka Francophonie ntabwo dutanga inkingo,...ariko kwihutisha iyi gahunda ni byo turimo kuko mwabonye ko bifata igihe kinini cyane kugira ngo izi nkingo zigere mu bihugu bitandukanye".

Charles Michel na we yizeza ko azakangurira inganda zo kuri uwo mugabane gukora inkingo za Covid-19 nyinshi zizoherezwa muri Afurika mu gihe cya vuba.

Minisitiri w’Ubuzima, Dr Daniel Ngamije yasobanuye ko abo bayobozi beretswe uburyo ikoranabuhanga ririmo gufasha mu gukwirakwiza inkingo no kubika amakuru y’abakingirwa bose muri mudasobwa z’ibitaro n’ibigo nderabuzima birenga 550 mu gihugu hose.

Mu Rwanda hamaze gutangwa inkingo zirenga ibihumbi 350 zo mu bwoko bwa AstraZeneca na Pfizer ku bakozi b’inzego zitandukanye bahura n’abaturage benshi, mu rwego rwo kubarinda kwanduzwa icyorezo Covid-19.

Shakisha izindi nkuru
kigalitoday android app mobile

Ibitekerezo   ( 1 )

Amakuru neza mutugezaho ni mwubahwe kandi dushimiye cyane abo bayobozi bake kudutabaza inkingo ingana ibahe ubushobozi numugishaaa!!

Hafashimana yanditse ku itariki ya: 9-03-2021  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka