Ibiro by’Umukuru w’Igihugu, Village Urugwiro, byatangaje ko ibiganiro byabo byibanze ku gushimangira umubano w’ibihugu byombi, mu nzego zirimo ubucuruzi n’ishoramari.

U Rwanda rwari rusanzwe rufitanye amasezerano y’ubufatanye na São Tomé na Príncipe, kuko mu mwaka wa 2017 byashyize umukono ku masezerano mu bijyanye n’ubukerarugendo, umutekano n’ubwikorezi bwo mu kirere.

Isinywa ry’aya masezerano ryabaye nyuma y’uruzinduko Minisitiri w’Intebe w’icyo gihugu, Patrice Trovoada, yagiriye mu Rwanda tariki ya 29 Ukuboza 2016, yakirwa na Perezida Kagame.

Uru ruzinduko rwa Minisitiri w’Intebe wa São Tomé na Príncipe ruzongera imikoranire myiza n’u Rwanda, mu rwego rwo gukomeza kwagura umubano mwiza n’ibikorwa by’iterambere mu mibereho myiza y’abaturage, gukomeza kubaka ibikorwa remeza hashorwa imari mu nzego zitandukanye.

Uru ruzinduko rwa Minisitiri w’Intebe Trovoada, ruje nyuma y’uko muri Gicurasi mu 2022, itsinda ry’abayobozi baturutse muri icyo gihugu, riyobowe na Minisitiri w’Ubutabera, Uburenganzira bwa Muntu akaba n’Intumwa Nkuru ya Leta, ryagiriye uruzinduko rw’akazi i Kigali ndetse basura Laboratwari y’u Rwanda y’ibimenyetso bya gihanga byifashishwa mu butabera (Rwanda Forensic Laboratory).