Ni ibirori byitabiriwe na Arikiyepesikopi wa Kigali akaba n’Umuyobozi wa Diyosezi ya Kibungo, Antoine Cardinal Kambanda, ari na we watuye igitambo cya misa cyabanjirije ibi birori.

Ni umunsi kandi wahuriranye n’Umunsi mukuru w’Abatagatifu bose wizihizwa tariki ya mbere Ugushyingo buri mwaka, mu kwemera kwa Kiliziya Gatolika.

Umuyobozi w’Akarere ka Ngoma, Niyonagira Nathalie, yasabye abakiristu bitabiriye uyu muhango, kurwanya igwingira ndetse no kurushaho kwitabira gahunda za Leta.

Yagize ati “Nk’inzego za Leta turasaba abakirisitu bateraniye hano kurwanya igwingira rituruka ku mirire mibi, gushishikariza abana kudata amashuri no kwitabira izindi gahunda za Leta nka EjoHeza, Mituweli kuko tuzi neza ko roho nzima itura mu mubiri muzima.”

Paruwasi Gatolika ya Zaza yashinzwe mu 1900, ikaba iya kabiri yashinzwe mu Rwanda nyuma ya Paruwasi Gatolika ya Save.

Yashinzwe n’abamisiyoneri bera baje berekeza ku kiyaga cya Mugesera kiri mu Karere ka Ngoma. Iyi Paruwasi ikaba yarahawe izina rya Bikiramariya w’Abatagatifu bose.