Murekatete Marie Honorete umuyobozi w’itsinda ryo kurwanya ubuharike avuga ko inshoreke 19 zimaze kwirukanwa mu nzu z’abagabo bafite abandi bagore

Abitangaje mu gihe itsinda rya ba mutima w’urugo rizwi ku izina rya ‘Mugore ntuhere mu gikari’ ry’Umurenge wa Rukomo rimaze kwirukana inshoreke 19 mu ngo z’abagabo mu myaka 8 rimaze rishinzwe.

Umuyobozi w’itsinda ‘Mugore ntuhere mu gikari’, Murekatete Marie Honorete, rya ba mutima w’urugo mu Murenge wa Rukomo avuga ko barishinze bagamije kurwanya ihohoterwa rikorerwa mu ngo, ubuharike n’inda ziterwa abana b’abangavu.

Avuga ko mu kurwanya ubuharike bakangurira abagore gukora kugira ngo birinde guhora basaba abagabo babo icyo bakeneye cyose kuko basanze bamwe baharikwa kubera iyo mpamvu.

Ati “Hari abagore baharikwa bibaturutseho, hari abanga gukora kandi twasanze abagore b’abanebwe abagabo babo babaharika kuko kenshi barambirwa guhora basabirizwa.”

Mureketete Marie Honorete avuga ko mu myaka 8 itsinda ryabo rimaze rikora rimaze guca ubuharike mu murenge wa Rukomo.

Ngo mu itsinda ryabo harimo abashinzwe kumenya amakuru bakayabasangiza aho bamenye umugabo wacyuye undi mugore bakamuzindukira bakamusaba kumwirukana ku neza.

Kugeza ku itariki 10 Werurwe 2020, inshoreke 19 ni zo zari zimaze kwirukanwa mu ngo z’abagabo baba babashatse.

Murekatete agira ati “Hari abagore bashinzwe kuduha amakuru, iyo umugabo azanye umugore wa kabiri tukabimenya tuzindukira iwe, tukamusaba gukingura tukabigisha, wa mugore akagenda mu mahoro ntitumukubita ahubwo iyo yanze tumushyikiriza inzego z’umutekano. Abo nibuka twirukanye mu mazu ni 19 kuva twatangira, byatumye abagabo babitinya ntibagiharika.”

Umuyobozi w’Akarere ka Nyagatare wungirije ushinzwe imibereho myiza y’abaturage, Murekatete Juliet, na we ashima ibikorwa by’iri tsinda akanasaba abandi bagore kubigiraho.

Avuga ko bagiye gufatanya n’inama y’igihugu y’abagore hagashingwa amatsinda nk’aya hagamijwe kurandura ibibazo byugarije umuryango nyarwanda.

Ati “Harimo ababyeyi bafite umutima ukunda imiryango ya bagenzi babo, hari abamaze kumva akamaro ko kubyara abana bafitiye ubushobozi, dukomeje tukaganiriza abandi babyeyi twabona itsinda rimeze nka ryo ndetse menshi mu mirenge yacu.”

Akomeza agira ati “Twagenda dukora ayo matsinda agahugurwa ni ibintu twabonye bifite umusaruro kandi tugiye kwigiraho kugira ngo tubikoreshe.”

Umuyobozi w’itsinda “Mugore ntuhere mu gikari”, Murekatete Marie Honorete avuga ko umugore ugaragaweho ibikorwa bitabahesha agaciro ahamagarwa akagirwa inama ndetse akanahanishwa gutanga amafaranga 500 ajya mu isanduku y’itsinda.

Itsinda “Mugore ntuhere mu gikari” rya ba mutima w’urugo mu Murenge wa Rukomo rigizwe n’abagore 69.

Mu bikorwa byo kwiteza imbere bakora, birimo kuboha uduseke kugira ngo babone amafaranga yo kwiteza imbere.

Imbogamizi bafite, ngo ni uko aho banyuze usanga baryanirwa inzara n’abagabo bavuga ko bababujije amahoro kuko badatuma bashaka abagore ba kabiri, kimwe ngo na bamwe mu bagore bagifite imyumvire ko guharikwa ntacyo bibatwaye ahubwo kubibabuza ari ukubangamira uburenganzira bwabo.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1817 )