Umuhungu we Mazimpaka Fred ukunze kuba muri urwo rwuri, avuga ko izo mparage zaje mu rwuri rwabo mu mwaka wa 2019, ziza ari enye zirahabyarira zikaba zimaze kuba zirindwi (7).

Avuga ko zibabangamiye cyane ku buryo yifuza ko RDB yazihakura kuko zibateranya n’abaturanyi kandi batabasha kuzirukana.

Ati "Zirya umunyu mba naguriye inka, zirandira ubwatsi aho zirisha hakabaye harisha inka zanjye. Ikiruse byose zinteranya n’abaturanyi kuko zipfumura uruzitiro rwanjye buri gihe noneho inka zikahaca zikajya konera abaturanyi bakandihisha".

Akomeza agira ati "Icyifuzo ni uko batwara izi nyamanswa zabo kuko zirandembeje, sinkizibashije, ngura amazi y’inka urabona imvura yarabuze na zo zikayanywa, RDB se izansubiza ko nyororeye?"

Umukozi wa RDB ushinzwe Pariki z’igihugu no kubungabunga ibinyabuzima, Ngoga Theresphore, avuga ko izo nyamanswa ari inyamahoro, bityo n’uwo mworozi yakwihangana kugeza igihe bizashobokera zigahindirwa muri Pariki.

Avuga ko ariko uwo mworozi abishatse yabisabira uburenganzira akazororera mu mwanya we kuko itegeko ribyemera, gusa hakarebwa niba afite ubushobozi bwabyo.

Agira ati "Imparage ntizona ubwatsi bwinshi kandi aho zirisha ntizibangamirana n’inka. Yenda ikibazo ni umunyu niba awuraza mu rwuri kuko ntakitawukunda. Ariko niba zisenya uruzitiro inka zikahaca zikonera abandi ni ikibazo twabonera igisubizo bidakuruye amakimbirane."

Ngoga avuga ko bazasura uyu mworozi bakarebera hamwe icyakorwa.

Ikindi ni uko mu gihe imparage ubwazo ziramutse zonera abaturage bakamurihisha, baba bamuhohoteye kuko hari ikigega gishinzwe kwishyura ibyangijwe n’inyamanswa.

Ikindi kibazo ni uko Imparage zitoga kandi zikaba zitera uburondwe, nk’uko Kigali Today yabitangarijwe n’abashinzwe ubuvuzi bw’amatungo, icyakora na none ngo ntizatera uburenge kuko zitagira icyara.