Ibi urwo rubyiruko rwabigarutseho mu gikorwa cyo gutangiza ku mugaragaro gahunda y’Urugerero rw’Inkomezabigwi icyiciro cya 11, yitabiriwe n’intore z’urubyiruko rwasoje umwaka w’amashuri yisumbuye 2022-2023; ku rwego rw’Akarere ka Musanze, igikorwa kikaba cyabereye mu Murenge wa Busogo ku wa Mbere tariki 25 Nzeri 2023.

Urwo rubyiruko ruvuga ko hari ibibazo byinshi bikibereye abaturage inzitizi mu iterambere ryabo, rubona ko rukwiye kugiramo uruhare kugira ngo bibonerwe ibisubizo.

Kabera Jayden ati “Turacyafite imiryango myinshi itishoboye idafite aho iba, bigaragara ko igisubizo gikwiye kuva mu bufatanye bwacu nk’urubyiruko. Mu ndangagaciro twagiye twigishwa tukiri ku ntebe y’ishuri, harimo no kuba hari icyo twakora duhuje imbaraga tugateza imbere Igihugu cyacu. Ubu rero iki ni cyo gihe cyo kubishyira mu bikorwa dufatanyije nk’urubyiruko, kandi dufite icyizere n’ishyaka by’uko tuzabigeraho mu buryo bworoshye”.

Uwingeneye Emmanuella na we ati “Hari ibikorwa remezo byinshi nk’imihanda n’ibindi bikeneye kubungabungwa cyane cyane muri iki gihe cy’imvura turimo, kuko iba yaraguyemo ibitengu cyangwa yaramezemo ibyatsi. Ibyo duteganya kubikoraho ari nako dusibura inzira zitwara amazi kugira ngo imihanda yongere ibe nyabagendwa”.

Ati “Amaboko yo kubikora twe nk’urubyiruko turayafite kandi twiteguye gukorana umurava, duharanira kuba ab’imbere mu kuzamura iterabere ry’Igihugu cyacu, binyuze muri uru rugerero twatangiye dore ko n’amaraso ya gisore tuyafite”.

Ibikorwa Intore z’Urubyiruko rwitabiriye Urugerero rw’Inkomezabigwi mu byiciro byabanjirije iki, bishimwa n’abaturage bemeza ko hari urwego rufatika rw’imibereho byabagejejeho.

Urugero ni nk’urw’umuturage witwa Nyiraguhirwa Florida wo mu Mudugudu wa Murenzi Akagari ka Nyarubuye mu Murenge wa Musanze, wubakiwe inzu y’ibyumba bitatu n’uruganiriro byiyongeraho ubwiherero ndetse n’igikoni.

Ibikorwa bisa n’ibi byanakozwe mu yindi Mirenge ahasanwe imihanda, kubaka uturima tw’igikoni, gushishikariza abaturage kurwanya imirire mibi, kubungabunga ibidukikije n’ibindi.

Urubyiruko mu mihigo bahigiye imbere y’ubuyobozi harimo gukomereza aho bagenzi babo bagejeje, bibanda by’umwihariko ku mihigo Akarere kiyemeje gushyira mu bikorwa harimo no gushishikariza imiryango gusubiza abana mu ishuri, gukumira ibyaha birimo n’inda ziterwa abangavu n’ibindi.

Umuyobozi w’agateganyo w’Akarere ka Musanze, Hamiss Bizimana, yababwiye ko kugira ngo ibyo biyemeje babigereho, bisaba kurangwa n’ishyaka n’imico myiza.

Ati “Umuntu ntiyaba anywa ibiyobyabwenge ngo agire imitekerereze y’ikintu gifatika yamarira Igihugu. Mugomba kuzirikana ko tugifite ibibazo duhanganye nabyo byugarije imiryango birimo amakimbirane, umwanda ndetse n’ubukene. Amaboko n’ibitekerezo byanyu nk’urubyiruko birakenewe cyane kugira ngo tubashe kubihashya burundu kandi kubishobora nyabyo birabasaba kuba mushyize imbere imyitwarire ndetse n’imico bibereye Umunyarwanda”.

Yababwiye kandi ko kubaka Igihugu n’iterambere rirambye, bisaba kurwanya amacakubiri bivuye inyuma, bagaharanira kwimakaza ubumwe bw’abanyarwanda.

Mu mirenge yose igize Akarere ka Musanze, mu gihe cy’amezi atatu Urugerero ruzamara, urubyiruko ruzajya rukora ibikorwa rutaha mu miryango yabo. Ababarirwa mu 1400 bakaba bamaze kwiyandikisha kandi imibare iracyiyongera kuko kwiyandikisha bigikomeje.

Mu Turere twose tw’Igihugu abasaga ibihumbi 77, bakaba ari bo bitezwe kuzakora Urugerero rudaciye ingando.