Bajya kwiba bitwaje intwaro gakondo

Imirenge yibasiwe n’ubwo bujura ni Kinigi, Nyange na Musanze ahazwiho ubuhinzi bwiganjemo ubw’ibirayi, aho bamwe mu bahinzi bajya mu mirima gusarura bagasanga imyaka yibwe.

Abatungwa agatoki mu kugira uruhare muri ubwo bujura, ngo ni insoresore zikomeje kwiba muri iyo mirima zitwaje intwaro gakondo (imihoro, imishyo…), kugeza n’ubwo ubasanze mu murima we bamukanga agakizwa n’amaguru.

Ubwo Polisi y’u Rwanda ikorera mu Karere ka Musanze yari imaze gufata umusore w’imyaka 18, wo mu Murenge wa Musanze, ubu ufungiye kuri Sitasiyo ya Polisi mu Kinigi, bamufashe amaze gucukura mu murima w’umuturage ibiro 30 by’ibirayi ku manywa y’ihangu.

Uwo musore yavuze ko yafashwe arimo kwiba ibirayi, ari kumwe na mugenzi we arafatwa undi aracika, akaba avuga ko asanzwe arinda imirima y’ibirayi.

Yagize ati “Mugenzi wanjye dukorana akazi ko kurinda imirima y’ibirayi, angezeho arambwira ati shahu turamutse tugiye kwiba ibirayi twabona ay’umusururu, ubwo twagiye turacukura abaturage batubonye tubakangisha imihoro, mugenzi wanjye arabacika njye ndafatwa banjyana ku kagari, Polisi ihita ihagera irantwara”.

Arongera ati “Ndemera ko ndi umujura kuko nafatiwe mu cyaha, uyu muhoro nawitwaje nk’intwaro imfasha kwitabara, iki cyaha nakiguyemo kubera mugenzi wanjye wanshutse. Baramutse bambabariye ntabwo nakongera kwiba, ndasaba bagenzi banjye kundeberaho ntibazongere kwiba, ubu nanjye nisubiyeho”.

Abaturage bo mu Murenge wa Kinigi na Musanze baganiriye na Kigali Today, kuri icyo kibazo cy’ubujura bwugarije imirima y’abaturage, bavuga ko izo nsoresore zikomeje kubibira imyaka zibakangisha ibyuma birimo imihoro, bashimira Polisi ikomeje gufata abo bajura.

Munyambonera Assiel ati “Abajura baraturembeje, urajya gusarura ugasanga nta kikiri mu murima, kandi ubugome bwabo baza kwiba bitwaje imihoro, urumva iyo umubonye ukizwa n’amaguru”.

Arongera ati “Polisi yacu ntacyo wayingaya, ni na wo mutekano dufite, iradutabara kandi ikomeje gufata abo bagizi ba nabi, gusa uretse nkanjye ushaje, ushoboye yafasha Polisi aba bajura tukabahashya. Uyu bafashe ntibamugarure mu baturage, bamujyanye mu bigo ngororamuco”.

Nyiramajyambere ati “Abajura baraturembeje kandi abiba ni abiyita abarinzi b’iyo mirima, izo nsoresore zirino guta amashuri zikaza zisaba akazi ko kurinda imyak,a byagera mu ijoro bakayiba, ikibazo ni imihoro baba bitwaje, ntiwatinyuka kumubona ngo uvuze induru, cyane cyane nkajye umugore sinagera mu murima ngo musangemo mvuge. Ni ukwiruka nagira amahirwe nkabona mbacitse”.

Mugenzi we ati “Ni Polisi yonyine iza ikabafata twe abaturage batubitsemo ubwoba kubera ibyuma bitwaza. Uramusanga mu murima akwiba ukanyonyomba ngo atakubona akakugirira nabi, kandi ntabwo biba mu ijoro gusa no ku manywa bariba, dore nk’uyu afashwe muri aya ma saa sita, Leta n’ikaze ibihano naho ubundi baraduteza inzara”.

N’ubwo umubare w’abo bise insoresore ukomeje kwiyongera umunsi ku wundi, Polisi mu Karere ka Musanze ivuga ko itazihanganira abo bagizi ba nabi, bakomeje guhungabanya umutekano n’iterambere ry’abaturage, nk’uko bivugwa n’Umuvugizi wa Polisi mu Ntara y’Amajyaruguru, SP Alex Ndayisenga.

Ati “Abaturage turabasaba ubufatanye mu kurwanya abo banzi b’umutekano n’iterambere ryabo, baduha amakuru ku gihe kandi turabizeza ko Polisi ifite imbaraga zihagije, mu guhagarika ubu bujura buvugwa hirya no hino”.

MENYA UMWANDITSI

Servilien Mutuyimana

Umunyamakuru

@ mutuyiserv

Reba inkuru zose nanditse ( 1853 )