Musanze: Biyemeje guha imbaraga irondo ry’umwuga mu kwicungira umutekano

Abatuye mu Kagari ka Kabazungu mu Murenge wa Musanze, ngo biyemeje gukomera ku irondo ry’umwuga baryongera imabaraga, nk’uburyo butuma babasha kwibungabungira umutekano, mu kwirinda ko hagira uwakongera kubameneramo ngo awuhungabanye.

Iyo hagize uwinjira muri aka gace batamuzi bihutira kumenya uwo ari we n
Iyo hagize uwinjira muri aka gace batamuzi bihutira kumenya uwo ari we n’ikimugenza

Kuva aho igitero cy’abagizi ba nabi, cyibasiye abaturage barimo n’abo muri santere yo mu Kajagari, ibarizwa muri ako Kagari ka Kabazungu, tariki 4 Ukwakira 2019, kigahitana abantu umunani baho; abahatuye ubu bahamya ko ingamba zo kwibungabungira umutekano zirimo n’Irondo ry’Umwuga, bashyizemo imbaraga zikomeje kugira uruhare mu kubarinda icyawuhungabanya.

Ndisanze Emmanuel, yagize ati “Abo bagizi ba nabi bataratugabaho igitero, twakoraga amarondo asanzwe, mu buryo bwa gakondo bisa n’aho tutayaha agaciro, ku buryo hari n’abatayitabiraga, mbese bisa n’aho tutabyitayeho. Kiriya gitero ubwo cyabaga kigahitana abacu, twabaye nk’abakangukiye kwicungira umutekano, dufata icyemezo cyo gushyigikira no guhagurukira amarondo y’umwuga mu buryo bufatika, yaba ubw’imbaraga n’ubw’amafaranga”.

Agira ati “Buri rugo rwo muri kano gace rutanga amafaranga 1000 buri kwezi, kandi tukayatanga tutagononwa, kugira ngo haboneke icyo guhemba abakora iryo rondo ry’umwuga no kubabonera ibikoresho bakenera mu gihe barikora, niba bakeneye amakoti, za botte, amatoroshi n’ibindi bakenera bituma barikora neza. Bakora amanywa na nijoro, aho baba bazenguruka agace kose, bagenzura niba nta cyahungabanya umutekano w’abaturage”.

Abaturage baho bagaragaza ko Irondo ry
Abaturage baho bagaragaza ko Irondo ry’Umwuga ribafatiye runini mu gucunga umutekano

Abaturage na bo ubwabo, ibikorwa byo gucunga umutekano ntibabihariye abakora irondo ry’umwuga gusa, kuko na bo bahora bari maso, bacunganwa n’uwo ari we wese, ugera muri kano gace, baba batamuzi bagakoresha uko bashoboye, bakamenya uwo ari we n’ikimugenza.

Bizumuremyi Jean Bosco agira ati “Hano buri wese aba ari ijisho rya mugenzi we, hagira nk’umuntu winjira muri kano Kagari tutamuzi, tugira amakenga, tugahanahana amakuru hagati yacu nk’abaturage n’ubuyobozi uhereye ku rwego rwo hasi, kugira ngo tumenye uwo muntu utugendereye uwo ari we, n’ikimugenza. Ni mu rwego rwo kunganira Irondo ry’Umwuga, tugamije kwirinda ko umwanzi yabona aho amenera, cyane ko ibyatubayeho ubwo abantu bacu bicwaga, byaratubabaje cyane, binadusigira isomo ryo kutongera kujenjeka”.

Abo bantu umunani baciwe mu gitero cyagabwe n’abacengezi baturutse mu mashyamba ya Repubulika Iharanira Demokarasi ya Congo mu 2019, barimo abo basanze mu ngo zabo abandi babicira muri santere yo mu Kajagari, iherereye mu Mudugudu wa Nyabageni mu Murenge wa Musanze. Aba biyongeraho abandi batandatu, na bo bishwe icyo gihe bo mu Murenge wa Kinigi.

Abantu umunani bishwe n
Abantu umunani bishwe n’abacengezi muri 2019 ubwo bahagabaga igitero bashyinguwe muri iyi mva
ADVERTISEMENT
rkad1
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka