Urwo rugo zatahuwemo mu ma saa kumi n’imwe z’igitondo cyo ku wa Gatatu tariki 28 Kamena 2023, ruherereye mu Mudugudu wa Kigasa Akagari ka Mburabuturo, Umurenge wa Muko mu Akarere ka Musanze.

Ngo rwari rusanzwe rwengerwamo bene izi nzoga, aho nyirazo yajyaga yifashisha uruvangavange rw’ibitubura, amatafari, isukari n’imisemburo bitujuje ubuziranenge, yarangiza akazigemura mu baturage mu Turere twa Musanze na Burera.

Umunyamabanga Nshingwabikorwa w’Umurenge wa Muko, Janvier Bisengimana, avuga ko hari hashize icyumweru bamenye aya makuru y’uko muri urwo rugo hengerwa inzoga z’inkorano, ari naho bahereye bakora ibishoboka ngo bazishakishe.

Yagize ati "Uwo mugabo yajyaga ajijisha akajya muri Vunga akazanayo nk’ijerekani imwe y’urwarwa, ababibona bakibwira ko acuruza urwagwa".

Ati "Yabikoraga ari nko kuyobya uburari kugira ngo abone uko afindafindira izo nzoga mu rugo rwe yazengeragamo, yarangiza akazikwirakwiza aziranguza mu baturage bakazigura batazi ko ari izibangiriza ubuzima".

Ubwo Polisi yageraga muri uru rugo hamwe n’izindi nzego bafatanyaga muri icyo gikorwa, yasanze uwo mugabo yatorotse, umugore we aba ari we ufatwa atabwa muri yombi.

Bisengimana yagize ati "Umugore agifatwa ntiyazujaye kwemera ko basanzwe bakora izo nzoga z’inkorano. Ubwo rero kugira ngo turengere ubuzima bw’abaturage byabaye ngombwa ko tuzimenera mu ruhame mu kwirinda ko zakomeza kwangiza ubuzima bwabo".

Yasabye abaturage kutishora mu bucuruzi nk’ubu kimwe no kuzinywa kuko zangiza ubuzima bwabo.

Ati "Ni ukumenya ko ziriya nzoga zikorwa hifashishijwe ibintu byangiriza ubuzima bitanujuje ubuziranenge. N’ikimenyimenyi abazinywa usanga baba barataye umutwe, batagifite ubushobozi bw’imitekerereze mizima ari na bo tubona bakunze gukora urugomo, bagahungabanya umutekano. Nibabireke ibyo kunywa n’ibyo gucuruza bizima birahari, babe aribyo bitabira".

Aho izi nzoga bazisanze banahabonye ibyo yifashisha mu kuzenga.