Aba bapolisi bakurikiye amasomo y’ibijyanye no kuyobora abapolisi ndetse bazanahabwa impamyabumenyi y’icyiciro cya gatatu cya kaminuza (Master) mu bijyanye no kwiga amahoro no gukemura amakimbirane (peace studies and conflict transformation) izatangwa na Kaminuza nkuru y’igihugu.

Chief Superintendent Celestin Twahirwa wungirije umuyobozi w’iri shuri, avuga go aba bapolisi bahawe amasomo atuma bagira ubumenyi bwo kuyobora bagenzi babo, bakaba bizeweho kuzabushyira mu bikorwa basubiye mu bihugu byabo bitandukanye.

Ati: “Abazarangiza bazatubera abambasaderi kandi bazafasha mu kugira imikoreranire myiza hamwe natwe mu gukumira ibyaha mu ruhando mpuzamahanga ndetse no mu gukemura amakimbirane n’ibibazo bikurikira amakimbirane”.

Assistant Commissioner Christine Alalo ukomoka muri Uganda, avuga ko bize kuba umuyobozi w’abandi kandi ngo ibi bisaba amasomo menshi kugirango umuntu abigereho. Ati: “Ningera iwacu, ibyo nize nzahita ntangira ku bishyira mu bikorwa”.

Ibihugu bifite abantu muri aya masomo ni Uburundi, Uganda, Tanzania, Djibouti, Zambia, Kenya, Somalia, Ghana, Sudani y’Epfo, Sudani ya Ruguru n’u Rwanda.

Jean Noel Mugabo