Musanze: Abahinzi barashishikarizwa kwitabira ubuhinzi busigasira ubutaka n’urusobe rw’ibinyabuzima

Nyuma y’uko bamwe mu bahinzi borozi bahuguwe ku gusigasira ubutaka n’urusobe rw’ibinyabuzima (Agro-ecologie), barashishikariza bagenzi babo kugana iyo gahunda kuko itanga umusaruro ugaragara.

Umuyobozi wa ACORD Munyentwari François
Umuyobozi wa ACORD Munyentwari François

Agro-ecologie ni ubuhinzi busigasira ubutaka cyangwa undi mutungo kamere ndetse n’urusobe rw’ibinyabuzima.

Umuyobozi w’umuryango ACORD, Munyentwari François ukangurira abahinzi kwibanda ku buhinzi busigasira ubutaka n’urusobe rw’ibinyabuzima asobanura intego yabyo.

Ati:"Twebwe muri gahunda ya Agro-ecologie tuyishyira hagati nk’igisubizo kuri byinshi byugarije isi muri iki gihe, nk’igihugu cyacu mu buryo bwihariye, cyane cyane ibibazo bijyanye n’indyo nziza, yuzuye, gufata neza ibidukikije, kwirinda ihindagurika ry’ibihe, Agro-ecologie ni yo nzira. Rero iyi gahunda turi kuyigisha abaturage batari abo mu matsinda gusa ahubwo n’ahandi dufite za porogaramu niyo gahunda twigisha abaturage.”

Akomeza avuga ko kwigisha aba baturage iyi gahunda ya Agro-Ecologie, bigamije ko abaturage bahindura imigenzo n’imigirire cyane cyane bikajyana no kubigisha icyatuma bakoresha neza umutungo kamere, n’urusobe rw’ibinyabuzima ku buryo n’abazatura isi y’ejo hazaza nabo bazasanga isi ari nziza.

Yavuze ko gukumira bimwe mu bikoreshwa mu buhinzi bituruka mu mahanga nk’imbuto n’ifumbire mvaruganda byose bishoboka ariko bikajyana no kugena igihe impinduka zigomba gutangira kugaragarira.

“Birashoboka kandi iyo ushaka impinduka ugira igihe utangirira, hari ibintu byinshi byabaye byatumye tugera aho turi ubungubu, aho tuvuga ngo ubutaka burangirika, ibidukikije birangirika, urusobe rw’ibinyabuzima birangirika, abantu bararya nabi, indwara ziriyongera cyane cyane indwara zitandura.

Foroduwari uyobora itsinda Abahuje
Foroduwari uyobora itsinda Abahuje

Ariko birashoboka ko rero ubutaka nubwo tuburundamo amafumbire mva ruganda dushobora gutangira tukayagabanya twongera amafumbire y’imborera, birashoboka ko twakoresha imbuto nyarwanda zihuye n’aho dutuye tukagabanya imbuto ziva mu nganda kuko birashoboka cyane kuri twebwe.”

Avuga ko kugeza ubu abahinzi bakorana na gahunda ya Agro-ecologie batangiye kubona ingaruka zo kwangirika k’ubutaka, ndetse ubu ikizere gihari ari uko iyi gahunda izagera ku bantu benshi mu bihe biri imbere.

Iyi gahunda ya Agro-ecologie iri gukorera mu Karere ka Musanze mu mirenge ya Gataraga na Muko, ndetse no mu Karere ka Ngororero mu murenge wa Nyange. Ni mugihe mu myaka itatu ishize yageze no mu Karere ka Bugesera na Kamonyi, intego ikazagukira no mu bindi bice byose by’igihugu.

Zimwe mu mbogamizi bahura nazo harimo iyangirika ry’ubutaka n’ibidukikije usanga byangizwa n’ibikorwa bya muntu.

“Hari abantu usanga bunguka kubera ibyo bakora byangiza ubutaka. Abacuruza amafumbire, imiti yica udukoko, imbuto zihinduwe. Turashaka kugenda munzira zijyanye nizo zindi twifuza ko ibyo bigabanuka, hanyuma ibyacu bikagenda bibisimbura gahoro gahoro.”

Avuga kandi ko gahunda yo gusarura ibyo kurya no kurya ibyasaruwe igifite imbogamizi kuko ibihugu muri iyi minsi byabaye isoko ry’ibiryo bikorerwa ahandi bigatuma iby’imbere mugihugu bigenda bita agaciro, ndetse iyi ikaba ari imbogamizi ikomeye.

Uyu muyobozi avuga ko hari ibikorwa bahuriraho na guverinoma y’u Rwanda byumwihariko Minisiteri y’ubuhinzi binyuze mu bushakashatsi bamuritse mu 2018 bwagaragazaga imigirire yakwinjizwa muri gahunda yo gusarura byinshi, ndetse bugaragaza ko hari imbuto nyinshi abaturage bifuza yagarurwa muri iyo gahunda yo gusarura byinshi, harimo amasaka, ibigori n’ibishyimbo.

Abagize itsinda Abahuje
Abagize itsinda Abahuje

Mukandahiro Margueritte, ubarizwa mu itsinda Abahuje, rifashwa n’umushunga ACCORD, avuga ko nyuma yo gufashwa n’uyu mushinga binyuze muri gahunda ya Agro-ecologie bamenye guhinga basimburanya imyaka mu murima.

Ati: “Ubundi mbere twarahingaga niba nahinze ibigori cyangwa se amasaka nkumva ko ariyo afite amafaranga maze n’ubutaha nkazayasubizamo.”
Mugenzi we akomeza amwunganira agira ati: “Gusimburanya imyaka ni ugufata ibinyampeke, ibinyabijumba, ibinyamisogwe tukagenda tubisimburanya.”

Bakomeza bavuga ko gusimburanya imyaka basanze ari ingirakamaro kuko bituma byera.

Bavuga kandi ko nyuma yo kuyoboka gukoresha ubu buryo batangiye kubona umusaruro kuko nubwo bo batigeze barwaza indwara ya bwaki, ariko abaturanyi babo bagiye bayirwaza bakabasha kubafasha kubona indyo nziza kandi yuzuye mu kurwanya imirire mibi.

Si ibyo gusa kuko bahinga bakanagurisha bakabasha kubona amafaranga yo kwishyura amafaranga y’ishuri y’abana no kwishyura ubwisungane mu kwivuza. Ndetse no kubasha guhinga ku buso bw’ubutaka ubwo aribwo bose bakabasha kububyaza umusaruro.

Niyitegeka Kagabo nawe ubarizwa mu itsinda ‘Abahuje’, avuga ko bashimira umushinga wa ACCORD kubera ko wabafashije guhinga bigamije kwiteza imbere bagasagurira amasoko.

Ati: “Mbere twahingaga mu kajagari nta murongo, ariko tumaze guhura na ACORD itwigisha guhinga, duhingira ku kigero tugatera imbuto z’indobanure kandi tugafumbira neza noneho tukiteza imbere dukoresheje izo nama batugiriye.”

Ifumbire y
Ifumbire y’imborera bikorera mu gufumbira imyaka yabo

Avuga ko kugeza ubu afite ubuzima bwiza, abana babasha kubona amafaranga y’ishuri, abasha kuva muri nyakatsi ndetse akaba abonera ku gihe ubwisungane mu kwivuza. Akagira inama abandi bahinzi kwihuriza mu matsinda ndetse no kwigiranaho kuko bibafasha kunguka ubumenyi butandukanye nk’ubwo bavana mu mushinga wa ACORD.

Umuyobozi w’itsinda ‘Abahuje’, Munyemanzi Froduald avuga ko iri tsinda ryashinzwe kugira ngo bahuze imbaraga bazamurane bahereye ku bushobozi bwa buri wese. Bafashanya kandi no mu bikorwa by’ubuhinzi.

Ati: “Dukorera hamwe, iyo umwe afite umurima akaduhamagara, akatubwira ko ashaka guhinga isambu ye, buri wese agakubita isuka ntitumaremo igihe kinini kandi tugatanga umubyizi ugaragara ndetse no gutera imbuto, mbese ntago twonsa umuhini.”

Avuga ko nubwo umushinga ACORD, wagize byinshi ubufasha ariko basanze batagomba kujya bayitega amaboko buri gihe bafata umwanzuro wo kujya bafashanya kugira ngo bagere ku iterambere byihuse harimo guhana amafaranga ndetse n’amatungo arimo inkoko n’inkwavu bikabafasha no kurwanya igwingira dore ko Akarere ka Musanze kaza mu turere twa nyuma mu kugira umubare munini w’abana bafite igwingira.

Bavuga ko iri tsinda rifite intumbero yo kugera ku bindi birushijeho nyuma gufunguza konti muri banki kuko bifuza ko bagira inzu yo gukoreramo ubucuruzi mu kubafasha kujya banarihahiramo nk’abanyamuryango. Ndetse ko ibyo bagezeho bifuza kujya babisangiza n’abandi bahereye ku baturanyi babo.

kigalitoday android app mobile

Ibitekerezo   ( 2 )

Abahinzi nitubigira ibyacu bizakunda. Ubuhinzi ndumburabutaka burambye bushingiye kunyongeramusaruro kamere (Techniques d’Agriculture Bio-Intensives)

Théoneste yanditse ku itariki ya: 11-07-2023  →  Musubize

Igihe ni iki rwose ngo abahinzi dutangire kwerekeza amaso k’ubuhinzi bubungabunga ibidukikije n’urusobe rw’ibinyabuzima hifashishijwe inyongeramusaruro z’umwimerere.

Théoneste yanditse ku itariki ya: 11-07-2023  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka