Andi makuru aturuka mu baganga bo ku bitaro bya Kabgayi, avuga ko batanu mubateweho Grenade bakomeretse bikabije ku buryo batatu muri bo bahise bajyanwa mu bitaro bikuru bya Kigali (CHUK).

Umwe mu bakomerekejwe n’iyo Grenade ariko akabasha kurokoka yasobanuye uko byamugendekeye muri aya magambo: “Njye nisanze ndi hasi gusa nikozeho numva nakomeretse, nubu sinzi uko byagenze”.

Undi mugenzi we wari uhagaze hafi y’ahatewe igisasu yatangaje ko yabonye moto ebyiri zaje zishoreranye iya mbere ikabanza igahita. Iya kabiri yari ihetse umuntu wambaye amadarubindi y’izuba ahita atera igisasu ahari hahagaze abantu benshi.

Uwateye igisasu yahise afatwa n’abashinzwe umutekano bari aho kuko impande n’impande bari bahari.

Aho iki gisasu cyaturikiriye bakunze kwita kwa Jacques, hakunze guhagarara abacuruza amakarita ya telefoni zigendanwa, abatwara moto ndetse n’abiganirira.

Gerard GITOLI Mbabazi