Iki gikorwa cyabaye kuri uyu wa Gatatu tariki 4 Nzeri 2024, Ingabo z’u Rwanda zatanze kandi ibikoresho bitandukanye by’ishuri birimo intebe 100 z’abanyeshuri, amakayi, amakaramu yo kwandikisha, ingwa, n’amakaramu yo gushushanyisha ku banyeshuri barenga 500.

Brig Gen Théodomille Bahizi, Umuyobozi wa Batayo ya gatatu (Task Force Battle Group 3) yavuze ko ko iyi mpano igamije kwerekana ko bishimira umubano n’ubufatanye biri hagati y’u Rwanda n’ingabo za Mozambique.

Ati “Twaje hano nk’Ingabo z’u Rwanda kugira ngo dufatanye n’Ingabo za Mozambique (FADM), kugarura amahoro n’umutekano muri Cabo Delgado, tuzi ko uburezi ari umusingi w’iterambere iryo ari ryo ryose. Ingabo z’u Rwanda ziyemeje gukomeza gukorana na bagenzi bacu bo muri Mozambique kugira ngo inshingano zacu zigere ku ntego twiyemeje”.

Umuyobozi w’Akarere ka Ancuabe, Benito Joaquim Santos Casimilo yashimye ubwitange bw’Ingabo z’u Rwanda ku bikoresho by’ishuri zageneye iryo shuri ndetse ashimira n’abana muri rusange anizeza ubufasha bwe igihe cyose bazamwiyambaza.

Umuyobozi w’ishuri, Faluki Silverio yashimangiye ko ibikoresho byatanzwe bizagira uruhare mu kuzamura ireme ry’uburezi ku banyeshuri.

Ati “Abanyeshuri barenga 500, bigaga nta ntebe zo kwicaraho, kandi badafite n’amakayi ihagije. Ibikoresho byatanzwe bizorohereza ishuri n’abanyeshuri kuzamura ireme ry’uburezi”.

Ingabo z’u Rwanda zagiye muri Cabo Delgado muri Nyakanga 2021, zifite intego nyamukuru yo kurwanya umutwe w’iterabwoba wa Ansar al Sunnah wahungabanyije umutekano w’iyi ntara kuva mu 2017.