Ni Umudugudu ujyanye n’igihe kuko uzatuzwamo imiryango yatoranyijwe mu batishoboye, n’abakuwe mu manegeka, hakaba harimo ibikoresho byose byo munzu n’ibigomba kubatunga. Uyu Mudugudu wuzuye utwaye Amafaranga y’u Rwanda arenga Miliyari 18, ukazakira imiryango 120.

Abatujwe muri uyu Mudugudu begerejwe ibikorwa remezo, birimo amashuri y’incuke, ibibuga byo gukiniraho, ikigo nderabuzima, isoko, inyubako z’ubuciruzi, aho kororera inkoko n’ibindi.

Icyo gikorwa cyanitabiriwe kandi n’abayobozi batandukanye, barimo Minisitiri w’Ubutegetsi bw’Igihugu, Jean Claude Musabyimana, Minisitiri w’Ibikorwa by’Ubutabazi, Kayisire Marie Solange, Minisitiri w’Ingabo, Juvenal Marizamunda, abayobozi bakuru mu Ngabo z’u Rwanda na Polisi n’abandi.

Abo bashyitsi bakomeje batambagizwa ibice binyuranye bigize uwo mudugudu, basobanurirwa ibihakorerwa.

Uretse Umudugudu wa Muhira watashywe uyu munsi tariki 4 Nyakanga 2023, hari ibindi bikorwa bitandukanye byakozwe n’Ingabo z’u Rwanda, harimo indi midugudu yubatswe nk’uwa Kaniga mu Karere ka Gicumbi, uwa Kivusha na Nyarurenzi yubatswe mu Turere twa Bugesera na Nyarugenge, yose izakira imiryango itishoboye 129, ikaba yarubatswe itwaye Miliyari 4,452,930Frw. Hari kandi ibigo nderabuzima byubatswe mu turere twa Kicukiro, Muhanga, Nyabihu, Bugesera, Musanze, Gasabo na Nyarugenge.

Hari inyubako zubakiwe imiryango 980 yarokotse Jenoside yakorewe Abatutsi itishoboye, kuvugurura urwibutso rwa Jenoside yakorewe Abatutsi mu Karere ka Kamonyi, kubakira amacumbi ishuri ryigisha umuziki mu Karere ka Muhanga, naho mu Karere ka Huye Ingabo z’u Rwanda zubatse ikigo gitanga ubumenyi.

Ingabo z’u Rwanda zigaragaza ko muri 2022-2023, zitaye ku bikorwa by’ubuhinzi n’ibidukikije, inganda zitanga amashanyarazi, imihanda ibilometero 186 hamwe n’ibiraro bitatu. Ni ibikorwa byatwaye agera kuri Miliyari 122,130,803Frw.