Murekaratwe Brigitte, uhagarariye iyi nama mu Murenge wa Ruhango, avuga ko hakiri umubare munini w’abagore, batinya kwiyamamariza ubuyobozi. Ibi ngo bibagiraho ingaruka zo kutamenya amakuru, bityo bigatuma badatera imbere.

Atanga urugero rw’uko akenshi hari nk’amafaranga aza agenewe guteza imbere abagore, ugasanga asubijweyo kuko abo yagenewe batigeze bamenya ayo makuru, kuko kenshi baba batari mu nzego z’ubuyobozi.

Ikindi ngo hari abagore bakora imishinga yabo bakeneye amafaranga, bakayitwara mu mabanki, imishimga yabo ikemezwa, ariko ntibakurikirane, kenshi bitewe no kutamenya amakuru, bigahera iyo.

Uyu muyobozi avuga ko ubu barimo gukora ubukangurambaga butandukanye, kugira ngo abagore batinyuke kwiyamamariza imyanya y’ubuyobozi, bityo na bo bajye babasha kumenya amakuru, bayageze muri bagenzi babo, batinyuke batere imbere.

Mukamugema, umugore utuye mu Kagari ka Nyamagana, Umurenge wa Ruhango, we avuga ko atari ugutinya kwiyamamariza iyi myanya ahubwo ngo benshi baba bitinya kuko batazi gusoma no kwandika.

Ati “Ubu se waba utazi gusoma no kwandika, wayobora abantu, ukabamarira iki koko?"

Uyu mugore, akifuzako abize, ari bo bajya bajya muri iyi myanya, ubundi bakajya bamanuka bakegera abatirize bakabasobanurira byinshi byabateza imbere.