Kugira abakozi bake ku kagari bituma serivisi zidatangwa uko bikwiye

Abayobora utugari bavuga ko kuba urwo rwego rugira abakozi bake bituma abaturage binubira serivisi babaha kubera ko batababona buri gihe uko babashatse.

JPEG - 345.6 kb
Abayobozi ku rwego rw’utugari n’imirenge barongererwa ubushobozi kugira ngo banoze serivisi batanga

Babitangaje ubwo bari mu mahugurwa yateguwe n’Ihuriro ry’uturere n’Umujyi wa Kigali (RALGA), yatangiye kuri uyu wa Mbere tariki 15 Ukwakira 2018 akazamara iminsi ibiri, ahuje abanyamabanga nshingwabikorwa b’utugari n’ab’imirenge ndetse n’abajyana bo mu karere ka Gasabo, agamije kubongerera ubushobozi.

Urwego rw’akagari ngo rugira akazi kenshi mu nzego z’ibanze ariko rukagira abakozi bake bigatuma hari abatishimira serivisi babaha, nk’uko bigaragazwa na Mukankurunziza Léoncie, uyobora akagari ka Musezero mu murenge wa Gisozi.

Yagize ati “Abakozi bari ku rwego rw’akagari ugereranyije na serivisi zihatangirwa usanga bakiri bake. Umuturage rero iyo ahageze ntahite abona icyo ashaka kubera wenda atahasanze umufasha agenda avuga ko atahawe serivisi nziza, icyo kiracyari imbogamizi mu mikorere yacu n’ubwo bitaduca intege”.

Mugenzi we uyobora akagari ka Kagugu, Mugabo Dan, na we ahamya ko icyo kibazo gihari.

Ati “Ku kagali turi abakozi babiri gusa, nshobora kuba narahaye umuturage gahunda hagahita hazamo amahugurwa nk’aya, yaza agasanga wenda na mugenzi wanjye yagiye mu zindi gahunda. N’ubwo mba nashyize ku muryango urupapuro rubisobanura, umuturage ntabyumva bigatuma atishimira serivisi dutanga”.

Yongeraho ko ayo mahugurwa abafasha kumenya uko bakwitwara mu bibazo bitandukanye bahura na byo, mbere y’uko icy’abakozi bake gikemuka.

Umunyamabanga mukuru wa RALGA, Ladislas Ngendahimana, yemeza ko ikibazo cy’abakozi bake ku kagari gihari ariko ko harimo kwigwa uko cyabonerwa igisubizo.

Ati “Urwego rw’akagari ni byo rugomba kongererwa abakozi, ni icyemezo cyarangije gufatwa hakaba harimo gusuzuma uko iryo vugurura rizakorwa. Ubu hari inyigo zirimo gukorwa zizabiha umurongo, igisigaye ni ukumenya igihe bizashyirirwa mu bikorwa”.

Ayo mahugurwa yatangiriye mu karere ka Gasabo, ariko bikaba biteganyijwe ko azagera no mu tundi turere twose tw’igihugu nk’uko bitangazwa n’ubuyobozi bwa RALGA, akaba afite insanganyamatsiko igira iti “Imiyoborere myiza, umuturage ku isonga”.

PROMOTED STORIES

Ibitekerezo   ( 3 )

abakizi babiri ni bake cyane rwose kandi abo Ku mirenge badasiba kongerwa nabo bakaza bacomeka Ku Kaari gasanganywe jkibazo. Ababishinzwe bihutishe iyo gahunda abakozi bongerwe

Vincent yanditse ku itariki ya: 26-10-2018  →  Musubize

nibyo koko , utugari nitwo musingi w’inzego zibanze murikim gihe, akazi gahari ni kenshi kandi ntabakozi bahagije, nabahri , haracyari ikibazo cy’agashahara, aho sibyo bibakurura kurya ruswa yahato nahato kubera kubura amikoro , kandi bavunika cyane, hari kandi ubusumbane bukabije mu mishahara ahabwa abari mu rwego rw’akarere,urw’umurenge, n’urw
akagali, ndetse nibyo bagenerwa biborohereza akazi, hakwiye kwiga uburyo bahabwa ubushobozi ku nguzanyo za banki, ariko bakishingirwa n’ikigega cy’inzego zibanze.

kagiraneza yanditse ku itariki ya: 16-10-2018  →  Musubize

oya si ikibazo cy’agashahara gake mwarimu ahembwa angahe ahubwo ni ukutanyurwa.None se ajya muri uwo murimo atazi amafranga uhemba.ahubwo ni za nda zaruse amaboko.

alias yanditse ku itariki ya: 18-10-2018  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka