Kuganira kuri ‘Ndi Umunyarwanda’ ni nko Gusenga Imana - Mayor Habarurema

Ubuyobozi bw’Akarere ka Ruhango burasaba abakozi bako kujya baganira kuri Ndi Umunyarwanda, kugira ngo bungurane inama kandi banoze ubusabane, kuko kubikora ari nko gusenga Imana, kandi kuko uwujuje indangagaciro z’Ubunyarwanda aba ari nta busembwa afite.

Habarurema asaba abakozi kuganira kuri Ndi Umunyarwanda kuko ari nko gusenga Imana
Habarurema asaba abakozi kuganira kuri Ndi Umunyarwanda kuko ari nko gusenga Imana

Umuyobozi w’Akarere ka Ruhango, Habarurema Valens, avuga ko kuba Umunyarwanda ari ukubyiyumvamo, kandi buri wese agaterwa ishema no kwitwa Umunyarwanda, yubahiriza indangagaciro z’Ubumwe, Gukunda Igihugu, Kugira ubupfura, Gukunda imirimo no kuwunoza.

Akomeza avuga ko gusenga Imana ari bumwe mu buryo abantu biheshamo amahoro, bakagira urukundo kandi bakumva bakize ibyago byabakurikiranaga, bakangira icyizere cyo gukomeza kurindwa n’Imana, ibyo bikaba binagaragara ku muntu ufite indangagaciro z’Ubunyarwanda.

Avuga kandi ko abakozi ku kazi iyo bakurikije indangagaciro y’Ubumwe bituma barushaho kwiyumvanamo, kandi bagasenyera umugozi umwe aho kwibona mu bice bibatandukanya, ibyo bikanatuma babasha gutanga serivisi nziza ku babagana kuko nawe baba bamwibonamo.

Meya Habarurema avuga ko abakozi ba Leta muri za Repuburika zabanje, baranzwe n’amacakubiri bituma igihe cya Jenoside yakorewe Abatutsi, bamwe bica bagenzi babo kandi bari basangiye umurimo kubera kubura indangagaciro y’Ubumwe.

Agira ati "Kwiyumvamo Ubunyarwanda biturinda kuba twakongera kwicana, kwangana kuko twese turi bamwe.Iyo uri mu kazi uba ugomba kubaha mugenzi wawe, iyo uri mu kazi ugakunze uba unoza inshingano zifitiye Abanyarwanda akamoaro, aho kumva ko ukora ngo uhembwe gusa".

Mu kiganiro kuri Ndi Umunyarwanda yahaye abakozi b’Akarere ka Ruhango, yavuze ko u Rwanda rwigeze kumera neza kubera ko abantu bakundanaga, umuntu akakirwa aho ageze, agacumbikayo, ariko biza gucika ku buryo kongera kubyigiraho byashimangira Ubunyarwanda bwangiritse kubera Jenoside yakorewe Abatutsi.

Agira ati "Hashize hafi imyaka 30 twongeye kuzamura Ubunyarwanda, ariko haracyari urugendo, birashoboka ko hari ucyitwara uko yiyumva kubera ibikomere, ntawe ukwiye guseka undi uko arimo kwitwara, kuko haracyari kare ugereranyije n’igihe cyashize tutagira icyerecyezo cy’Ubumwe".

Avuga ko intambwe imaze guterwa mu bunyarwanda n’ubupfura yigaragaza aho Abanyarwanda basigaye babanye nta rwikekwe, haba ku bagize uruhare mu gusenya u Rwanda n’abo bahemukiye.

Haracyariho inzitizi zibangamiye Ndi Umunyarwanda

Habarurema avuga ko n’ubwo hari intambwe imaze guterwa, hakigaragara n’ibibazo birimo, ibishingiye kuri Jenoside yakorewe Abatutsi n’ingaruka zayo, n’ ibikomere bya Jenoside.

Abakozi b
Abakozi b’akarere ka Ruhango bahamya ko kunga Ubumwe ari indangagaciro ibarinda amacakubiri mu kazi

Ibyo bigaragarira ku kuba hari abaturage b’akarere bazinutswe iwabo ku ivuko, kubera amateka yaho n’ibikomere bagifite, bene abo bakaba bagikeneye kwegerwa n’ubwo baba bari mu mirimo itandukanye.

Agira ati "Ni ugufashanya kugira ngo duhangane n’ingaruka z’ibyabaye, kuko hari n’abahunze Igihugu banze kugaruka, abacyibona mu ndorerwamo z’amoko nka zimwe mu ngaruka a Jenoside zishingiye ku bukungu n’iza politiki".

Abakozi b’Akarere ka Ruhango bagaragaza ko kuganira kuri Ndi Umunyarwanda bibafasha gutanga serivisi inoze ku bagana akarere, kuko iyo abakozi bunze ubumwe, bakunze akazi bubahana banafatanya gukemura ikibazo cy’umuturage, igihe ibyo asaba bireba abarenzi umwe.

Abakozi kandi banagaragaza ko urwego bagezeho n’ubwo rushimishije hakigaragara abafite ibikomere bya Jenoside, ku buryo hagiye gufatwa umwanzuro wo gushyira icyumba cy’ubujyanama ku karere gishinzwe kuganiriza abagize ibibazo by’ihungabana.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka