Umuyobozi w’akarere ka Kayonza avuga ko abayobozi muri ako karere bafite akazi gakomeye kuko usanga kenshi ababyara abana benshi ari bantu batanafite amikoro, baba biganjemo abimukira bagiye gushaka imibereho i Kayonza.

Bamwe mu baturage baca intege bagenzi babo bababuza kwitabira gahunda yo kuboneza imbyaro; nk’uko byemezwa n’umuyobozi w’ikigo nderabuzima cya Cyarubare.

Umuyobozi w’akarere ka Kayonza yasabye ko abo bantu bapfobya gahunda yo kuboneza urubyaro bigishwa ubwiza bwabyo byaba na ngombwa hagategurwa ikiganiro kizaca kuri radiyo aho abitabiriye kuboneza urubyaro bazatanga ubuhamya.

Bamwe mu baturage bavuga ko batangiye kubona ingaruka zo kubyara abana benshi ku buryo bavuga ko bagiye guhagurukira kugabanya imbyaro.

“Biragoye rwose, nk’iyo ufite abana batanu bose bagusaba amafaranga y’ishuri kandi wabuze n’ayo kubagurira ibyo kurya wumva utaye umutwe. Abakiri bato bakwiye kwitabira kugabanya imbyaro”; nk’uko Christine Mukamabano w’imyaka ikabakaba 50 yabidutangarije.

Abanyamabanga nshingwabikorwa b’utugari dutandukanye two mukarere ka Kayonza bavuga ko bagiye gufatanya n’abajyanama b’ubuzima mu kurushaho kwigisha abaturage kugira ngo bahindure imyumvire bitabire kugabanya imbayaro.

Cyprien M. Ngendahimana