Tariki 7/9/2015, nibwo yatawe muri yombi na polisi ya Kirehe nyuma yo kuroha umwana we w’imfura ariko ku bw’amahirwe ntiyapfa. Uyu mugore avuga ko yatekereje kuroha umwana we w’imfura w’imyaka 8 bitewe n’ibibazo by’ubukene.

Nyirahabimana avuga ko yafashe icyemezo cyo kuroha umwana we bitewe n’ubukene

Agira ati“ kubera imibereho mibi nageze aho mba nk’imyamaswa, mfata umwanzuro wo kujya kuroha umwana wanjye w’imfura kuko yari ambangamiye, ariko maze kumuroha ngira impuhwe ndatabaza abasare baramurohora”.

Uyu mugore w’imyaka 30 y’amavuko akomoka mu karere ka Karongi, yimukiye mu Karere ka Kirehe muri 2013 n’umugabo, ariko nyuma yo kugirana amakimbirane yamutanye abana batatu b’indahekana.

Mbarushimana Claude umwe mu basare barohoye uwo mwana, avuga ko babonye umugore ushoreye umwana ku nkombe z’akagera amusunikira mu ruzi biruka bajya kumurohora, hanyuma bahamagara ubuyobozi n’abashinzwe umutekano bamugeza kwa muganga atarapfa.

Umugabo Ngendakumana ngo yaba ari we nyirabayazana yatumye uyu mwana uhagaze arohwa

Ndungutse Térèsphore umunyamabanga Nshingwabikorwa w’akagari ka Cyunuzi uwo mugore azanswe acumbitsemo, avuga ko nubwo yitwaza ko kujya kuroha umwana we ari ubukene atari byo, ngo nyirabayazana ashobora kuba ari umugabo w’inshoreke ye.

Ati“ Uriya mugore arangwa n’imyitwarire mibi yo kudakora kandi hari uburyo dufasha abafite ibibazo by’ubukene ariko ntitumubona aba yibereye muri gahunda zidafatika.

Akomeza agira ati “Tubona kuba yaragiye kuroha umwana we ari imipango yari afitanya n’umugabo w’Umurundi witwa Ngendakumana Prosper bamaze iminsi babana banabyarana umwana wa kane. Uwo mugabo aza mu Rwanda agenda agaruka mu buryo bunyuranyije n’amategeko”.

Agira inama abaturage, Ndungutse yongeyeho ati “Gufata umwanzuro wo kwica umwana ni ibintu bigayitse, byaba byiza kwegera ubuyobozi ukavuga ibibazo ufite bukagufasha”.

Mu gihe Nyirahabimana na Ngendakumana bari mu maboko Rukiko rwisumbuye rwa Ngoma, ngo baburanishwe ku cyaha cyo kugambira kwica, umwana aritabwaho na Polisi Sitasiyo ya Kirehe mu gihe hategerejwe umugiraneza wamufasha.

Servilien Mutuyimana