Nyuma yo gufunga izo butike, ubuyobozi bwabwiye Abapangayi ko bagomba gushaka aho bimukira vuba bitarenze tariki tariki ya nyuma y’uku kwezi.

Iki gikorwa cyakozwe mu rwego rwo kubahiriza amabwiriza ya Minisitiri w’Intebe, aherutse guha inzego zibanze zo kwihutira kwimura abantu batuye ahantu hashobora kuvuka Ibiza byagira ingaruka ku bahatuye; nkuko bitangazwa na Ashir Niyireba, Umunyamabanga nshingwabikorwa w’umurenge wa Kicukiro.

Niyireba avuga ko ahanini ibi byemezo byaje kubera imvura iherutse kugwa mu mujyi wa Kigali tariki mu kwezi gushize igahitana abantu n’ibintu. Guhera icyo gihe iyo imvura ikubye umuyobozi wese arahangayika, yibwira ko abaturage batuye hafi y’ibishanga batarokoka.

Gusa banyiri ayo mazu bafungiye imiryango, ntibishimiye iki gikorwa kuko ngo bamaze gufata amafaranga y’Abapangayi bahita banayakoresha, ubu bakibaza aho baza kuyakura kugira ngo bayasubize banyirayo.

Ku bwabo ngo basanga ubuyobozi bwari bukwiye kubateguza mbere y’igihe butagombye kubibatura hejuru.

Fidel Hakizimana, umwe mu bacuruzi bafungiwe amazu, yavuze ko icyo gikorwa cyabatunguye, kuko iyo babimenya mbere baba barashakishije aho bimurira ibicuruzwa byabo. Avuga ko impungenge ari uko bagiye kuhahombera amafaranga menshi, yemeza ko aye arenga miliyoni eshatu.

Umudamu umwe utashatse kwivuga amazina arimo kurira, yagize ati: “Dore nkubu iyi nzu nayishyuye amezi ane, mfite abana biga, ubu se iminsi ingahe baduhaye urabona mpita mbona amafaranga yo kwishyura indi nzu, aba bana se ndabona aho bajya kwigira?”

Nubwo abatuye aka gace bifuza y’uko bahabwa ingurane kimwe n’abandi bimurwa, ubuyobozi bw’akarere ka Kicukiro buvuga ko bwamaze kubashakira aho bimukira muri Masaka, aho abaturage beretswe ibibanza gusa bagasabwa kwiyubakira.

Icyakora ubuyobozi bw’aka karere, buvuga umuntu uzagararaho ko atishoboye azashakirwa inkunga akubakirwa nk’uko hari bamwe batangiye gukodesherezwa nk’uko bitangazwa na Niyireba.

Gusa ugeze aha hantu aba baturage batuye, ubona hateye ubwoba kuburyo imvura iramutse ihaguye ari nyinshi, hashobora kuvuka ibibazo kuko amazi amwe yatangiye kurigita mu butaka.

Eric Muvara