Ibikorwa by’iterambere biriyongera umunsi ku munsi mu mujyi wa Musanze

Bagiye bashingira ku bikorwa remezo bihaboneka birimo amazu y’imiturirwa akomeje kubakwa, imihanda ya kaburimbo mu mujyi no mu nkengero zawo, amahoteli menshi ndetse n’abawugana baturutse mu bihugu binyuranye hirya no hino ku isi, baza gusura ibyiza nyaburanga byo muri ako gace birimo ingagi n’ibirunga.

Munyankiko Justin ati “N’utemera ko urukwavu ruryoha ajye yemera ko ruzi kwiruka, umujyi wa Musanze ni uwa kabiri mu Rwanda, ahubwo Kigali yitonde idasigara, ni umujyi uri gutera imbere cyane, reba ama etaje, reba imihanda ya kaburimbo no mu makaritsiye yagezemo, ba mukerarugendo baraza ntibifuze gutaha, niwo mujyi wa kabiri ufite ama etage meza, amahoteli meza, ibirunga n’ibindi”.

Dukuzumuremyi Gilbert ati “Ni uwa kabiri, utabibona yaba afite ikibazo, hari ibintu byinshi indi mijyi idafite bituma uba uwa kabiri, dufite ama hoteli menshi, imihanda ya kaburimbo iri gukorwa no mu duce tw’umujyi duherereye mu byaro, ni umujyi wakira abantu benshi bawugana, ni uwa kabiri kuri Kigali”.

Sibomana Peter ati “Musanze iteye ubwoba, genda kuri cya kibuga cyubatse hejuru ya GOICO urebe iyo mu kizungu hose, reba insengero zijyanye n’igihe, reba iyo miturirwa, uw’i Kigali ntacyo yaza atubwira turarenze, n’abakerarugendo iyo baje bemeza ko ari umujyi wa kabiri, nzi benshi ntwara kuri moto banze gutaha kubera ubwiza bw’umujyi”.

Mu makaritsiye imihanda ikomeje kubakwa

N’ubwo hafi ya bose baganiriye na Kigali Today bagaragaje ko umujyi wa Musanze ari uwa kabiri, hari n’abavuga ko hari ahagomba gukosorwa mu nkengero zawo hakiri utujagari n’amazu aciriritse azamurwa hatanzwe za ruswa.

Hari uwagize ati “Njye simbona Musanze nk’umujyi wa kabiri hari imijyi iwurenze, nka Nyamata igiye kuba umujyi wa kabiri ugiye guhiga umujyi wa Musanze, na Huye ni sawa, icyo nemera umujyi wa Musanze urusha indi ni inyubako, ama etage azamurwa ateye ubwoba, gusa haracyariho izizamuka mu tujagari, aho bubaka nyuma yo gutanga ruswa, gusa ndemeza ko ku nyubako Musanze iri imbere pe”.

Ni umujyi mu myaka itatu ishize byagaragaye ko ugenda utera imbere mu myubakire, nyuma yuko ubuyobozi bw’akarere ka Musanze bwafashe icyemezo cyo gufunga amazu y’ubucuruzi atajyanye n’igihe, ubuyobozi busaba ujya ashaka kubaka, kuzamura inzu byibura igeretse gatatu.

Imwe mu miturirwa yubatse mu mujyi wa Musanze

Meya w’akarere ka Musanze Nuwumuremyi Jeannine, numwe mubemeza ko umujyi wa Musanze ari uwa kabiri mu gihugu, aho avuga ko bagiye gukomeza kuwushyiramo ibikorwa bituma urushaho gusa neza, avuga ko bari muri gahunda yo kubaka Convention Center muri uwo mujyi, n’izindi nzu zigenewe kwakira inama mpuzamahanga.

Ni umujyi kandi bateganya kubakamo ikiyaga cy’igikorano, mu rwego rwo kureshya ba Mukerarugendo, umujyi ugaragaramo na Hotel z’icyitegererezo zubatse mu ntanzi z’ibirunga, zirimo Bisate Eco Lodge iherutse kugaragara muri Hoteri 100 nziza ku isi, aho kuyiraramo ijoro rimwe hishyurwa amafaranga y’u Rwanda atari munsi ya Miliyoni n’ibihumbi 200.

Inzu nshya zikomeje kubakwa

Inyubako z’ubucuruzi

Mu ikaritsiye y’ubucuruzi

Imiturirwa mu mujyi wa Musanze irayingayinga iy’i Kigali

Imwe mu nyubako nshya mu mujyi wa Musanze

Amahoteli akomeye ari mu byongerera agaciro Musanze. Iyi Hoteli yitwa Bisate Eco Lodge isakaje ibyatsi ikaba yubatse mu ishusho y’ibirunga

Ahateganywa kubakwa ikiyaga cy’igikorano mu mujyi wa Musanze

Fatima Hotel

GOICO: Isoko rikuru rya Musanze

ADEPR Muhoza

MENYA UMWANDITSI

Servilien Mutuyimana

Umunyamakuru

@ mutuyiserv

Reba inkuru zose nanditse ( 1846 )