Imva z’amakaro, imwe ifite agaciro k’amafaranga ibihumbi 605

Irimbi rya Rusororo riri mu Karere ka Gasabo, ni ryo rimbi rikuru rishyingurwamo abatuye mu Mujyi wa Kigali bo mu byiciro bitandukanye, kuva ku bari abayobozi bakuru b’Igihugu kugera ku baturage basanzwe b’amikoro make.

Iri rimbi ryagiyeho muri 2011 risimbura iry’i Remera-Kimironko mu Mujyi wa Kigali ryari rimaze kuzura kandi riri hagati mu mujyi hatisanzuye.

Hari abantu bakeka ko i Rusororo na ho hagiye kuzura, ariko umwe mu bakozi b’ikigo cyitwa Cons-Tech Ltd gishinzwe imicungire y’iryo rimbi, avuga ko hakiri umwanya mugari wo gushyinguramo abantu bitaba Imana.

Imva zisanzwe z’isima gusa zifite agaciro k’amafaranga ibihumbi 305

Nyirahakizimana agira ati "Nta n’ubwo turageza hagati y’aho tugomba kugera kuko imbago z’irimbi zigarukira epfo ku gishanga".

Akomeza asobanura ko ibiciro byo gushyingura i Rusororo biri mu byiciro bitandukanye hagendewe ku mikoro n’ubushake bya buri muntu.

Imva ya mbere ihenze n’ubwo ngo nta giciro cyagenwe, ni ishyingurwamo umuntu witabye Imana yari Umuyobozi Mukuru, icyiciro gikurikiyeho kikaba icy’imva zubakishije amakaro zigurwa amafaranga ibihumbi 605.

Iri rimbi rimaze gushyingurwamo abari abayobozi bakuru umunani

Icyiciro cya gatatu ni icy’imva zitwikirije isima gusa(hatariho irangi), zikaba zigurwa amafaranga ibihumbi 305, hakaza imva zisanzwe z’igitaka gusa ngo zigurwa amafaranga ibihumbi 20.

Umuntu wa mbere washyinguwe mu irimbi ry’i Rusororo bigaragara ko yitwaga Prof Ilunga L Pierre, akaba yari Umunye-Congo wavukiye muri Katanga ariko akaza kwitaba Imana ari Kigali.

MENYA UMWANDITSI

Simon Kamuzinzi

Umunyamakuru

@SimonKamuzinzi

Reba inkuru zose nanditse ( 2465 )