Insengero n’amashuri byafunzwe kubera Coronavirus

Minisiteri y’Ubuzima ishingiye ku ntera icyorezo cya Coronavirus kimaze gufata, yashyizeho amabwiriza mu rwego rwo kugabanya ikwirakwizwa ry’icyorezo cya Coronavirus.

Itangazo rya Minisiteri y’Ubuzima riravuga ko aya mabwiriza ahita ashyirwa mu bikorwa kandi akazamara nibura ibyumweru bibiri:

 Insengero zirafunga guhera kuri iki cyumweru tariki 15 Werurwe 2020. Abantu barashishikarizwa gusengera mu ngo.

 Amashuri na za kaminuza (bya Leta n’abigenga) birafunga guhera ku wa mbere tariki 16 Werurwe 2020.

 Abakozi babyumvikanyeho n’abakoresha babo, barasabwa gukorera mu rugo aho bishoboka.

 Amahuriro y’abantu benshi nk’imikino ndetse n’ubukwe bibaye bisubitswe. Abitabira imihango yo gushyingura na bo barasabwa kujyayo ari bake.

 Ibikorwa by’ubucuruzi na za Resitora birakomeza gukora hasishikarizwa ko hashyirwa intera ya metero imwe byibuze hagati y’abantu.

 Ingendo zitari ngombwa zigomba kugabanywa mu rwego rwo kwirinda ubucucike mu modoka zitwara abagenzi.

Gukaraba intoki ndetse no kwirinda guhurira ahantu hateraniye abantu benshi ni bwo buryo bwonyine bwo kurwanya ikwirakwizwa rya Coronavirus. Ni muri urwo rwego Minisiteri y’Ubuzima yibutsa Abaturarwanda gukomeza gukaraba intoki hakoreshejwe isabuni n’amazi meza ndetse no kwirinda guhurira ahantu hari abantu benshi.

Udupfukamunwa dukenerwa cyane cyane n’abakozi bo kwa muganga cyangwa abarwayi.

Umuntu wese ufite ibimenyetso bisanzwe bya Coronavirus (inkorora, umuriro) asabwe kuguma mu rugo agahamagara umurongo utishyurwa wa 144 cyangwa akamenyesha umujyanama w’ubuzima umwegereye kugira ngo ahabwe amabwiriza n’ubufasha.

Guverinoma y’u Rwanda irahumuriza Abaturarwanda kuko nta gikuba cyacitse, ndetse ko abantu badakwiye guhangayika, ahubwo ko ibirimo gukorwa ari uburyo Leta y’u Rwanda irimo gukoresha kugira ngo irinde abaturage kwandura.

MENYA UMWANDITSI

kigalitoday android app mobile

Ibitekerezo   ( 1 )

Kwirinda mbere nabi byiza

Byukusenge joseph yanditse ku itariki ya: 15-03-2020  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka