Yavuze kandi ko hari icyizere cyo kongera kuzamura ubukungu bw’Igihugu, nyuma y’uko kuri ubu habonetse inkingo zikomeje gutangwa hirya no hino mu gihugu.

Ibi Umukuru w’Igihugu yabigarutseho mu ijambo yavugiye mu Isengesho ryo gusengera Igihugu no gushima Imana ryabaye kuri iki Cyumweru tariki 28 Werurwe 2021. Ni isengesho ryabaye hifashishijwe ikoranabuhanga mu rwego rw’ingamba zo gukumira icyorezo cya COVID-19.

Ubu ni ubutumwa Perezida Kagame yatangiye muri iryo sengesho:

Abagize Rwanda Leaders’ Fellowship,
Abari hirya no hino mu gihugu,
Mbanje kubasuhuza.

Nishimiye ko umuco wo gushima no gusengera Igihugu cyacu ugikomeza, no muri ibi bihe by’icyorezo cya COVID-19.

N’ubwo guhangana na cyo bidutwara igihe kinini, birakwiye ko dufata uyu mwanya tugasengera Igihugu cyacu.

Dufite byinshi byo gushimira.

Turashimira cyane cyane ko Abanyarwanda twese dufatanyije n’abayobozi bacu, twashoboye kwirinda ingaruka zikomeye z’iyi ndwara.

Twishimiye kandi inkingo twabonye zizadufasha gusohoka muri ibi bihe twatewe na COVID-19 tukongera kubaka ubukungu bw’Igihugu cyacu.

Nk’Abayobozi rero, guhura dutya, ni umwanya mwiza wo gutekereza ku nshingano zacu no kongera imbaraga, ubushake n’uburyo byo gukomeza gukorera Abanyarwanda.

Ntawashidikanya ko iki cyorezo cyagize ingaruka zikomeye ku Banyarwanda, cyane cyane abasanganywe intege nke.

Ibyo dukora byose rero, tugomba kubikora tuzirikana buri gihe ko tubikorera abo dushinzwe.

Ntabwo nshidikanya ko iri sengesho ry’uyu munsi ritwongera imbaraga n’ubushake byo gukorera hamwe kugira ngo tugeze Igihugu cyacu ku rwego twifuza.

Ibi biradusaba gukora byinshi kurushaho, kandi neza, tunashakisha uko twakwishumbusha igihe twatakaje. Uwo ni wo mugisha twifuriza u Rwanda n’Abanyarwanda.

Murakoze.