Abakorera muri aya mazu bahawe kugeza tariki 25/08/2012 kugira ngo babe bayavuyemo. Hashize imyaka gahunda yo kuhabimura barayimenyeshejwe ariko ntishyirwe mu bikorwa; nk’uko umuyobozi w’umujyi wa Kigali, Fidel Ndayisaba, abitangaza.

Mu kiganiro n’abanyamakuru kuri uyu wa gatanu tariki 24/08/2012, Ndayisaba yavuze ko bamaze gukorana na ba nyiri ibibanza ku buryo igishushanyo mbonera kizahita gishyirwa mu bikorwa, bagendeye ku mishinga ba nyiri ubwite batanze.

Ati: “Ririya zinga ryose rikikijwe n’imihanda ya kaburimbo kuva kuri Kigali City Tower ukazernguruka kuri UTC ukagaruka aho. Riri muri gahunda y’ahagomba kubakwa mu buryo bwihuse kugira ngo bihuzwe n’igishshanyo mbonera ariko byongerere n’amahirwe kuri ba nyirayo yo kwinjiza amafaranga menshi”.

Abenshi mu bakoreraga muri iki gice, kuri uyu munsi byagaragaraga nk’aho nta na gahunda yo kwimuka ihari ariko bavuga ko bitabatunguye kuko bamaze igihe kinini babizi ndetse bakaba biteguye kuhava.

Jacques Mugenzi, umwe mu bakorera muri iki gice ati: “Nta kubogama kurimo kuko bamaze igihe baraduteguje ndumva buri wese yariteguye agashaka iseta yo gukoreraho”.

Ibikorwa byo kwimura abacuruzi bagera ku 150 bakoreraga mu miryango 50 yabaruwe, byatwaye miliyari zigera ku 160 z’amafaranga y’u Rwanda. Hakazubakwa amazu agerekeranye y’ubucuruzi n’ayo kubamo.

Ndayisaba yizeza ko ibikorwa byo kuhubaka bitazatinda kubera ko hari hasanzwe ibikorwa remezo nk’imihanda n’amashanyarazi, bizasaba ivugurura gusa.

Emmanuel N. Hitimana