Abasirikari biga muri iryo shuri riherereye i Nyakinama mu Karere ka Musanze basanga hari ibikwiye gukorwa mu maguru mashya kugira ngo gushyira mu bikorwa gahunda zirebana no kurwanya imirire mibi mu bihugu byo ku mugabane wa Afurika byubahirizwe.

Abagomba kwibandwaho cyane cyane mu kurwanya iyo mirire mibi ni abana bato n’abagore batwite.

Ibi babigarutseho mu rugendoshuri batangiye mu Ntara y’Amajyaruguru kuva ku wa kabiri tariki 05 Gashyantare 2019. Ni itsinda rigizwe n’abasirikari 17 basanzwe biga mu ishuri rikuru rya gisirikari bo mu bihugu birimo Senegal, Malawi, Tanzaniya, u Rwanda na Zambiya.

Ni igikorwa ngarukamwaka gitegurwa n’iri shuri hagendewe ku nsanganyamatsiko iba yatoranyijwe. Uyu mwaka haribandwa ku kurwanya imirire mibi, aho bagaragarijwe ishusho y’uko iki kibazo gihagaze muri iyi ntara kugira ngo bizabafashe kunoza ubushakashatsi na za raporo zikubiyemo ibitekerezo n’ubujyanama bigamije kunganira inzego za gisivile kunoza neza politiki zihamye muri gahunda yo guca imirire mibi nk’uko Lt Col Jean Marie Vianney Kayigamba wari ukuriye iri tsinda yabihamirije Kigali Today.

Yagize ati: “Ingabo ntizibereyeho gucunga umutekano ahari intambara gusa, kuko henshi mu bihugu byacu ku mugabane wa Afurika usanga hari ibindi bibazo bishobora kuba imbarutso y’umutekano mucye; ikibazo cy’imirire mibi rero kiri muri byo kandi giteye inkeke, ni yo mpamvu rero nitubasha kugira ishusho y’imiterere yacyo bizatuma tubona uko dutanga ibitekerezo n’umurongo w’ibyo tubona byafasha mu kubona igisubizo ku muti urambye”.

Intara y’Amajyaruguru yo igaragaza ko hari icyo yungukiye mu biganiro bagiranye n’aba basirikari bakuru nk’abantu bafatwa nk’inararibonye muri gahunda zituma imibereho y’abaturage iba myiza, dore ko ubushakashatsi na za raporo zigomba gutangwa zizagera henshi kandi mu buryo bwagutse nk’uko byagarutsweho na Guverineri w’Intara y’Amajyaruguru, Gatabazi Jean Marie Vianney.

Abasirikari 48 biga muri iri shuri (Rwanda Defence Force Command and Staff College) bigabanyijemo amatsinda agomba gukorera ibikorwa nk’ibi mu ntara zose z’igihugu. Ibyo bazakusanya bazabyandika mu bitabo mu gihe bitegura gusoza amasomo bazaba bamazemo igihe cy’umwaka muri Kamena uyu mwaka wa 2019.