Mu mihigo ya 2021-2022 Akarere ka Musanze kaje mu turere dutanu twa nyuma (25/27).

Naho muri Raporo y’Ikigo cy’Igihugu cy’Imiyoborere ya 2024 igaragaza uko abaturage bishimira imiyoborere, ako karere kagaragara ku mwanya wa 30/30.

Ibi kandi byiyongeraho imyanya mibi ako karere kakunze kuzaho muri gahunda yo kurwanya igwingira mu bana, ndetse no muri gahunda y’isuku n’isukura.

Ni akarere kandi kakomeje kugaragaramo ibibazo mu miyoborere, aho kamaze kuyoborwa n’aba Meya batanu mu myaka irindwi ishize.

Ibyo bibazo bigenda bigaragara muri ako karere, bikaba byagira ingaruka ku mibereho myiza n’iterambere ry’abaturage bigashyira akarere mu myanya mibi, ni kimwe mu bikomeje kwibazwaho na benshi mu batuye ako karere, nk’uko bamwe mu baturage babitangarije Kigali Today.

Hagenimana Venuste ati ‟ tukababazwa no guhora twumva akarere kacu mu myanya ya nyuma mu mihigo no mu zindi Raporo tubona. Twumvise ko ako karere kari no ku mwanya wa nyuma muri raporo ya RGB y’uburyo abaturage bahabwa serivise”.

Arongera ati ‟Iyo turebye, tubona akarere kacu kari gutera imbere. Reba iyi miturirwa yubakwa, reba amahoteli yo ku rwego rw’isi yubatswe mu Kinigi, reba imihanda urebe uburyo abantu bakunda kudusura baza kureba ibyiza nyaburanga birimo ingagi n’ibirunga, ariko buri gihe tukiyumva inyuma, twe biratuyobera”.

Mugenzi we ati ‟Birangora kwiyumvisha uburyo tuza inyuma mu bintu byose kandi dukize, nitwe tugaburira hafi igihugu cyose ibirayi, nitwe dufite ubutaka bwera, nitwe dukungahaye ku kirere cyiza udusuye akumva atataha, ariko ukumva ngo turi abanyuma mu mihigo, mu miyoborere, mu kurwanya igwingira, ntabwo tubyumva”.

Nyuma yo kubona izo mpungenge abatuye Akarere ka Musanze bagenda bagaragaza, zijyanye n’uburyo akarere kagenda kaza inyuma muri raporo zitandukanye z’uburyo uturere dukurikirana, Umuyobozi w’ako karere, Nsengimana Claudien, yagize icyo avuga kuri icyo kibazo, mu nama Komite Nyobozi y’ako karere iherutse kugirana n’abanyamakuru bakorera mu Ntara y’Amajyaruguru.

Yavuze ko kuba akarere gahora kaza ku mwanya wa nyuma, icyabuze ari ukumenyekanisha ibyo akarere gakora ngo abaturage babimenye.

Ati ‟Umwanya wa nyuma twagiyeho muri Raporo ya RGB, nimusoma iyo raporo murasanga kuba Musanze yaraje ku mwanya wa 30, si uko tudafite ibikorwa byadushyira ku mwanya wa mbere. N’ikimenyimenyi Huye yabaye iya mbere iri mu rugendoshuri hano i Musanze, bivuze ngo hari ibyo bagomba kutwigiraho”.

Arongera ati ‟Icyabuze ni ukumenyekanisha ibyo dukora, tukabatumira ngo mudufashe kubimenyekanisha, ku baturage ari nabo bagenerwabikorwa. Mu by’ukuri ibikorwa birahari ariko abaturage ntibabizi, ndetse n’ibitakozwe ngo basobanurirwe impamvu bitakozwe n’ingamba biri gufatirwa ngo bikorwe”.

Yerekana uburyo iyo raporo igaragaza ko abikorera b’i Musanze (PSF) hari ibyo batakoze mu gihe uyu mwaka akarere katashye inzu icumi z’amagorofa.

Akomeza agira ati ‟Ntabwo ari twebwe twaba tugaragara ko tudafite ibikorwaremezo mu gihe dufite imihanda ya kaburimbo iri ku burebure bwa kilometero 168.

Arongera ati ‟Ntabwo ari twe twavuga ko turi inyuma mu gihe twujuje isoko ry’ibiribwa ryatwaye miliyari 4,5Frw, mu gihe dufite isoko rinini nka GOICO, mu gihe dufite agakiriro kagezweho n’ibindi. Bivuze rero ko icyaburaga ari ukumenyekanisha ibyo dukora, ese tumenyekanisha dute ibyo dufiteho ibibazo cyangwa tutarakora ngo abaturage bacu babimenye, ndetse banatekereze bagaragaze n’uruhare rwabo mu guhigura imihigo”.

Uwo muyobozi yasabye abanyamakuru kugira uruhare mu gufasha abaturage gusobanukirwa ibyabateza imbere n’icyazamura imibereho yabo, birinda amakosa arimo kubaka ahashyira ubuzima bwabo mu kaga bakubahiriza igishushanyo mbonera n’ibindi.