Inzu y’ababyeyi mu bitaro bya Gisenyi yangijwe n’imitingito

Ibitaro bya Gisenyi bizakurwa mu mujyi wa Gisenyi byimurirwe mu Murenge wa Rugerero, nyuma y’uko byangijwe n’imitingito yakurikiye iruka ry’ikirunga cya Nyiragongo cyarutse muri Gicurasi 2021.

Umuyobozi w’Akarere ka Rubavu, Kambogo Ildephonse, avuga ko bakeneye kubaka ibitaro bifite ubushobozi bwo kwakira abatuye Akarere ka Rubavu, abavuye mu Karere ka Nyabihu na Rutsiro hamwe n’abavuye mu mujyi wa Goma.

Agira ati "Dufite serivisi z’ingenzi ku bagana ibitaro byacu, ariko twifuza kubaka ibitaro bijyanye n’igihe."

Ibikorwa byo kubaka ibitaro bishya bya Gisenyi, bizaterwa inkunga n’igihugu cya Hungary, ndetse Ambasaderi w’icyo gihugu yamaze guhura n’Umuyobozi bw’Akarere ka Rubavu.

Ahazwi nka Gihira imbere y’uruganda rw’amazi rwa WASAC rwubatse mu Murenge wa Rugerero, niho hazubakwa ibitaro bya Gisenyi kandi bikuzura mu myaka itatu.

Raporo ya Minisiteri ishinzwe ibikorwa by’ubutabazi (MINEMA) yo ku itariki ya 13 Nyakanga 2021, yagaragaje ko ibyangijwe n’imitingito mu Karere ka Rubavu, kubisana ndetse no gusimbura ibyangiritse burundu bikazatwara 91.430.692.000 z’Amafaranga y’u Rwanda.

Zimwe mu nama itsinda ritanga harimo kuvugurura igishushanyo mbonera cy’umujyi wa Rubavu.

Muri rusange inzu z’ibi bitaro zirashaje ari yo mpamvu bigiye kwimurwa

Hazakenerwa miliyari 1.9 arenga mu bikorwa by’ ubuzima, harimo ibitaro by’Akarere ka Rubavu bikeneye kwimurirwa mu birometero bitanu uvuye aho biri ubu, nk’igisubizo kirambye.

Ibitaro bya Gisenyi byubatswe mu mwaka wa 1930, uretse kuba bifite inyubako zangijwe n’imitingito, ziranashaje ndetse bikaba byugarijwe n’impanuka z’imodoka nini zibura feri zikabigonga kenshi, ndetse rimwe na rimwe zikagwa mu bitaro.

Kwimura ibitaro bizafasha Akarere ka Rubavu kubona ibitaro bifite inyubako zigezweho, kwitarura impanuka z’imodoka no gutandukana n’umututu uca mu bitaro waciwe n’imitingito.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )