Ndayisaba Emmanuel, Umunyamabanga Nshingwabikorwa w’Inama y’Igihugu y’Abantu bafite Ubumuga

Ndayisaba Emmanuel uyobora NCPD, avuga ko iki gikorwa kizasubikwa muri Werurwe bitewe n’ubushobozi bwabaye buke, bityo kikazasubukurwa ari uko habonetse ubushobozi.

Ati: “Ibarura ry’abantu bafite ubumuga ryari ririmo gukorwa rigiye gusubikwa kuko tutarabona abafatanyabikorwa. Mu ngengo y’imari ivuguruye nta yandi twahawe, ryari kuzarangirana n’iy’ubu ariko mu ngengo y’imari itaha izatangira muri Nyakanga batwemereye andi, ubwo tutabonye abafatanyabikorwa tuzategereza”.

Ndayisaba akomeza avuga ko ingengo y’imari nibayibonera igihe muri Nyakanga bizagera muri Nzeri basoje iki gikorwa.

Avuga ko kuba barabonye amafaranga make, bibangamiye iki gikorwa kuko bizatuma intego za NST1 zitagerwaho uko byari biteganyijwe, ndetse ko kugihagarika bigasubukurwa nyuma byangiza n’ibindi byinshi.

Ibarura ry’abantu bafite ubumuga ryari rigamije kumenya imibare yose y’abantu bafite ubumuga, kumenya imbogamizi bafite mu nzego zose zirimo ubuzima, uburezi, imibereho n’ubutabera ndetse n’ibindi.

Ryari rigamije kandi gushaka ibisubizo ku bibazo cyangwa imbogamizi bizagaragazwa n’abakoreweho ibarura mu byiciro bitandukanye.

Ingengo y’imari yakoreshwaga muri iki gikorwa yateguwe mu ngengo y’imari ya 2023-2024, aho NCPD yahawe Miliyoni 430 mu gihe hari hakenewe Miliyoni 846 z’amafaranga y’u Rwanda kugira ngo iki gikorwa kirangire neza.

Ubwo iki gikorwa cyatangiraga mu mpera z’umwaka wa 2023, Umuyobozi w’Inama y’Igihugu y’abantu bafite ubumuga, Emmanuel Ndayisaba, yavuze ko impamvu nyamukuru y’iki gikorwa ari ukwegeranya amakuru, kuko ibarura rusange ry’abaturage riheruka kuba hari ayo ritabashije kwegeranya, kuko mu bibazo ryashingiyeho bo bari bafitemo ibibazo bitandatu gusa.

MENYA UMWANDITSI

Umukazana Germaine

Umunyamakuru

@ Umukazana11

Reba inkuru zose nanditse ( 786 )