Huye: Urubyiruko rw’abakorerabushake rwaremeye uwamugariye ku rugamba

Urubyiruko rw’abakorerabushake (Youth Volunteers) rwo mu Karere ka Huye, rwizihije umunsi wo kwibohora ruha inka ingabo yagize uruhare mu kubohora u Rwanda ikaza gukomereka, byayiviriyemo kumugara.

Charles Ntaganzwa (ufite imbago) ashyikirizwa ku mugaragaro inka yagenewe n
Charles Ntaganzwa (ufite imbago) ashyikirizwa ku mugaragaro inka yagenewe n’urubyiruko rw’abakorerabushake

Emmanuel Musangamfura, umuyobozi w’uru rubyiruko rw’abakorerabushake mu Karere ka Huye, avuga ko Charles Ntaganzwa w’i Gishamvu ari we bahaye inka.

Ngo ni n’ubwa kabiri ku itariki nk’iyingiyi (tariki 4 Nyakanga) bahaye inka ingabo itakiri ku rugerero yagize uruhare mu kubohora u Rwanda, kuko umwaka ushize baremeye uw’ahitwa i Mpare mu Murenge wa Tumba.

Iki gikorwa biyemeje kuva mu mwaka ushize ngo ni icyunganira n’ibindi basanzwe bakora birimo gukora umuganda, kubaka ubwiherero, no gufasha abaturage mu kurwanya imirire mibi bubaka uturima tw’igikoni.

Ibi byose ngo babikora nta gihembo bategereje, bafatiye urugero ku rubyiruko rwiyemeje gufata intwaro rukabohora Igihugu.

Agira ati “Ubukorerabushake twabutangiye mu mwaka wa 2013. Icyo gihe twaricaye nk’abigaga muri kaminuza, turibaza ngo ko bakuru bacu b’urubyiruko babashije kubohora Igihugu, ni iki twebwe twakora cyagaragaza ko turi gufasha igihugu cyacu? Twiyemeza rero gufatanya n’inzego z’ubuyobozi mu gukemura ibibazo bigenda bigaragara mu muryango.”

Ntaganzwa wahawe inka, afite imyaka 54. Yacitse ukuguru kw’iburyo, anaremara ukuboko kw’ibumoso. Umugore we ni we ukorera urugo, umugabo akamwunganira mu turimo duke ashoboye.

Yishimiye impano y’urubyiruko kuko ngo izamufasha kugira amasaziro meza, anywa amata.

Agira ati “Narabashimye. Imana yo mu ijuru izabongerere imbaraga nyinshi cyane, bazahe n’abandi.”

Umugore we Goretti Nyiransabimana na we yishimira inka bahawe, kuko ari nziza. N’abantu ngo bagiye babimubwira avuye kuyakira.

Ati “Abo duhuye barambazaga ngo ese iyo nka ni iyo uguze? Nti yego. Bati uguze inka nziza, genda wiyicarire ubundi winywere amata. Ndayizana nyigeza mu rugo, numva ndanezerewe.”

Mu Karere ka Huye hari urubyiruko rw’abakorerabushake ibihumbi 12 na 800. Inka bahaye Ntaganzwa bayiguze amafaranga ibihumbi 300 begeranyije. Kandi ngo si ubwa nyuma baremeye ingabo yamugariye ku rugamba, kuko bafite gahunda yo kubigira ngarukamwaka.

kigalitoday android app mobile

Ibitekerezo   ( 1 )

Urubyiruko rwabakorerabushake turashima uruhare bagira mukuzamura imiberehomyiza y’Abaturage byumwihariko akarere ka Huye vuba ku munsi w’intwari Bari bagabiye undi muturage mu murenge wa Rwaniro ho mu karere ka Huye nawe wamugariye ku rugamba rwose turashima ubuyobozi bw’Akarere ka Huye burangajwe imbere na Nyakubahwa Mayor Ange SEBUTEGE wubatse ikizere n’ubushobozi murubyiruko rwa karere ka Huye igisobanuro cy’imiyoboreremyiza mukomereze aho @HuyeRYVCP.

Mukunzi Mathieu yanditse ku itariki ya: 7-07-2022  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka