Nk’uko byatangajwe n’umuyobozi wa CECYDAR Patrick Nimubona, avuga ko muri iki cyumweru hazatangwamo inyigisho ku muryango hifashishijwe urugero rwiza rw’imibereho ya Rugamba Sipiriyani n’umufasha we Daforoza.

Ati “Mu rwego rwo kwizihiza ibikorwa by’impuhwe byaranze ubuzima bwa Sipiriyani Rugamba na Daforoza Mukansanga uyu mwaka wa 2023, CECYDAR ifatanyije na Kominote ya Emanweli mu Rwanda yateguye iminsi ine ifite insanganyamatsiko igira iti:“Kubana gikirisitu mu rugo” (Abanyakolosi 3, 18-21) nk’inkingi y’imibanire iboneye umuryango mu bihe bya none”.

Nimubona avuga ko iyi minsi igizwe n’inyabutatu y’iyamamazabutumwa izasozwa n’umunsi wa kane w’urugendo nyobokamana rugana mu rugo rwa Sipiriyani na Daforoza Rugamba mu rwego rwo kuzirikana umutima w’impuhwe wabaranze.

Nimubona avuga ko ari gahunda mpurirane n’ukwezi kw’Umuryango Mutagatifu by’umwihariko umunsi mukuru wa Bikira Mariya utarasamanywe icyaha; aho ababyeyi biteguye kwibaruka n’abagitegereje urubyaro bahabwa umugisha kuri Centre ya Emmanuel.

N’ubwo iyi gahunda ishingiye ku bashinze igikorwa cyo kwita ku bana bari mu kaga, insanganyamatsiko y’uyu mwaka iragutse ku buryo igera no ku bana babo nka bamwe mu ngingo zigize umuryango kandi bari bafite uruhare mu kwitagatifuza no gutagatifuzanya nk’umuryango ndetse na buri wese ku giti cye.

Ni na gahunda mpurirane kandi n’ukwezi k’Umuryango Mutagatifu, aho izafasha abakristu kwitegura amaza ya Nyagasani ku munsi mukuru wa Noheli, ikazafasha by’umwihariko kuzirikana ku buzima bw´abagaragu b’Imana Sipiriyani Rugamba na Daforoza Mukansanga nk’ishuri ry´imibereho n’imibanire bya gikristu mu muryango mu bihe by’ubu aho intwararumuri z’uburere n’imibanire bya gikristu bikendera mu muryango nyarwanda.

Ati “Ukongera kureba umugambi w’Imana ku muryango by’umwihiriko ku Kubana gikristu mu rugo (Abanyakolosi 3; 18-21); hagamijwe gucengera Umugore mu mugambi w’Imana mu muryango wa gikristu.

Imiryango yitabiriye inyigisho yahawe ishusho banasobanurirwa neza imyitwarire n’imigenzo byaranze Daforoza Mukansanga nk’umutima w’urugo, n’icyo umugore mu muryango wa gikristu wa none yamwigiraho.

Umugabo, umutwe w’urugo rwa gikristu n’umurinzi w’urukundo mu muryango aho basobanuriwe imyitwarire n’amatwara bya Sipiriyani Rugamba nk’umutwe w’urugo uhamije ibirindiro n’icyo umugabo wa none yamwigiraho mu gutuma urugo rurangwa n’ituze, akarurinda umwaga, inabi n’ikindi kibi cyose cyarutera guhungabana bityo ukaba igicumbi cy’urukundo n’indangagaciro za gikristu bihamye.

Karemera Samuel n’umufashawe Groliose Umugwaneza bavuga ko inyigisho bahawe zizabafasha gukomeza gusigasira umubano wabo.

Ati “ Urebye imico n’imigenzo byarangaga umuryango wabo byari byiza ku buryo twese ntawe utakwishimira kugira umuryango mwiza n’uwabo kandi turebeye ku myitwatire y’abana ba Daforoza na Sipiriyani Rugamba, nk’imbuto z’urukundo n’umugisha wa Nyagasani mu mugambi we mu rugo rwa gikristu”.

Karemera avuga ko ari umwanya wo gufata ingamba n’ibyemezo bito biganisha abagize umuryango ku gukosora ibitanoze no guhinduka kugirango buri wese mu bawugize yumve kandi acengere neza inshingano n’uburenganzira afite hashingiwe ku ndangagaciro za gikristu Kiliziya Gatolika yemera kandi yigisha.

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1672 )