Mu gikorwa cyabaye tariki kuwa Kane 18/04/2013, Agnes Ntibanyurwa, umwe mu bahagarariye Ishami ry’umuryango w’abibumbye ryita ku baturage mu Rwanda (UNFPA), yavuze ko ibitekerezo biri gukusanywa ari ibirebana n’iterambere,umurimo, kurwanya ubukene n’ibindi.

Ati: “Turimo turakira umusanzu waburi wese, icyo yifuza kuri gahunda z’iterambere n’umurimo, ubukene, uburinganire hagati y’umugore n’umugabo, ubuzima ndetse no kubungabunga ibidukikije”.

Yavuze ko ibi bitekerezo biri gukusanywa, kugirango bizatangwe nk’igihugu uzabe ariwo musanzuwacu, cyane ko intego z’ikinyagihugumbi zishize, umuturage atigeze azigiramo ijambo ku rugero rumwe n’iziri gutegurwa.

Ntibanyurwa,avuga kandi ko ubu ibitekerezo bicyakirwa, ikizavamo kikaba kizatangarizwa abantu. Abagore bo mu nzego zitandukanye nibo batumiwe, nk’abahagarariye abandi,abahinzi, abari mu makoperative,abatize, abahejejwe inyuma n’amateka n’abandi.

Consolee Nyirahabimana, umugore uturuka mu murenge wa Gacaca akarere ka Musanze, avuga ko igitekerezo yifuza ko kitabura mu by’ingenzi ari ikirebana no kwegereza abaturage amashanyarazi kuko ngo ari imwe mu nkingi z’iterambere.

Ati: “Turifuza kandi ko gahunda zo kubungabunga ibidukikije nazo zazibandwaho, kuko iyo bihungabanyijwe Ibiza bitwugariza, bigatuma tutakaza imyaka, amazu ndetse bamwe bakahatakariza ubuzima”.

Iyi gahunda yo gukuzanya ibitekerezo ku bijyanye n’ibizibandwaho mu ntego z’ikinyagihugumbi zitaha, yabereye mu turere tune duhagarariye intara zose, harimo Musanze mu ntara y’Amajyaruguru.

Jean Noel Mugabo