Guma mu Rugo yitezweho kugabanya ubwandu bwa Covid-19 kugera kuri 75%

Umunyamabanga wa Leta muri Minisiteri y’ubuzima, Lt. Col. Dr Mpunga Tharcisse, yatangaje ko bizeye ko gahunda ya Guma mu Rugo yashyiriweho Umujyi wa Kigali n’uturere umunani tubonekamo ubwandu bwinshi bwa Covid-19 izabugabanya ku kigero cya 75%.

Dr Mpunga Tharcisse
Dr Mpunga Tharcisse

U Rwanda rukomeje guhangana n’imibare izamuka y’abandura n’abicwa na Covid-19 kuva muri Kamena 2021.

Minisiteri y’Ubuzima yemeje ko mu bipimo iri gufata yabonye ubwoko bushya bwa COVID-19 buzwi nka Delta.

Ingamba nshya zizatangira gukurikizwa ku ya 17 Nyakanga.

Lt. Col. Dr Tharcisse Mpunga, Umunyamabanga wa Leta muri Minisiteri y’Ubuzima, mu gitondo tariki ya 15 Nyakanga 2021, yabwiye RBA ati "Ibizamini dukora muri iyi minsi biratwereka ko 60 ku ijana by’abanduye ari ubwoko bwa Delta."

Mu minsi itanu ishize, u Rwanda rwabaruye abantu 3,905 bashya banduye COVID-19, abanduye bose hamwe bagera kuri 50,742 kuva icyorezo cyatangira muri Werurwe 2020.

Kwiyongera kwa Covid-19 bijyana no kwiyongera kw’abapfa ariko bisaba n’ubushobozi bwinshi mu kwita ku barwayi kuko imibare y’abarwayi mu bitaro yazamutse ku buryo bugaragara.

Dr. Mpunga yagize ati: "Turizera ko gufunga bizagabanya umuvuduko w’ubwandu 70%, niba byubahirizwa."

Agira inama abantu bose kubahiriza ingamba zo kwirinda ikwirakwira ry’icyorezo zirimo kwirinda kujya ahari abantu benshi.

Yashishikarije abantu gukurikiza ingamba, mu gihe abashinzwe ubuzima bita ku barwayi bo mu bigo nderabuzima.

Yemeza ko uko abantu benshi bazakingirwa urugamba rwo kurwanya icyorezo rugenda rworoha.

Mu Rwanda ubu habarurwa abantu 50,742 bamaze kwandura COVID-19 kuva icyorezo cyagera mu Rwanda, abamaze gukira ni 35,582, naho abo imaze gutwara ubuzima ni 607, mu gihe abamaze gukingirwa ari 401,160.

Icyakora n’ubwo umubare wo gukingira wiyongera, habarurwa abantu 74 barembye, naho ibipimo bya Covid-19 bimaze gufatwa mu Rwanda ni 1,744,198, ijanisha ry’ubwandu rikaba rigeze kuri 17.5%.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka