Dallaire yabitangarije mu mahugurwa yabareye i Kigali kuri uyu wa kane tariki 14/11/2019, yateguwe n’umuryango witwa ’Romeo Dallaire Child Soldiers Initiative’, yashinze agamije kurwanya iyinjizwa ry’abana mu gisirikare.

Uyu muryango wahuye na bamwe mu ngabo z’ibihugu bya Tanzaniya, Uganda, Kenya, Somaliya, Sudani, Sudani y’Epfo, u Rwanda hamwe n’abahagarariye ingabo ziri mu butumwa bw’amahoro hirya no hino muri Afurika.

Gen. Dallaire ahora avuga ko Umuryango w’Abibumbye (UN) watereranye ingabo zari iza FPR-Inkotanyi mu rugamba rwo guhagarika Jenoside, ndetse ko wo wagombye kuba warakumiriye hakiri kare.

Yasobanuye icyatumye ashinga umuryango ufasha UN gukumira iyinjizwa ry’abana mu gisirikare, aho afasha ibihugu kwemeza no kubahiriza amasezerano yasinyiwe i Vancouver muri Canada muri 2017, agamije kwirinda kwinjiza abana mu gisirikare.

Gen. Dallaire yagize ati “Abana ni ishingiro ry’ubukangurambaga butuma intambara ibaho mu buryo burambye, kuko bo bayitangira bakiri bato bakayikomeza kugeza babaye bakuru.

Ubwicanyi bwabaye hano mu Rwanda bwakozwe n’abakiri bato, Interahamwe bari abana. Iyo ukoresheje abana mu gisirikare uba wishe abazarwanirira igihugu bose.

Icyagakwiye gukorwa ni uko abana bashobora kuba umusemburo w’amahoro, iyo uhuguye neza abasirikare n’abapolisi rero, ni bo bashobora kuzana izo mpinduka”.

Dallaire asaba ibihugu kwirinda gukoresha abana igisirikare ndetse no kujya kubikangurira abandi hirya no hino ku isi aho bifite abasirikare n’abapolisi mu butumwa bw’amahoro.

U Rwanda rufite ingabo, abapolisi n’abasivili barenga ibihumbi bitandatu mu bihugu bya Repubulika ya Santarafurika, Sudani na Sudani y’Epfo.

Minisitiri w’Ingabo, Maj Gen. Albert Murasira, avuga ko Leta ndetse na we ku giti cye, bashyikiye amasezerano ya Vancouver kandi bazayashyira mu bikorwa.

Umuvugizi w’Ingabo, Lt Col. Innocent Munyengango, akomeza avuga ko amahugurwa bahawe n’umuryango wa Dallaire azabaha ubushobozi bwo kurinda abana igisirikare mu Rwanda no mu mahanga aho ingabo z’u Rwanda ziri hose.

Agira ati “Habayeho kugirana amasezerano na Romeo Dallaire Initiative, ikigamijwe cy’iyi nama ni ukugira ubumenyi buzadufasha gutanga amasomo hirya no hino ku isi aho turi, kugira ngo tubwire n’abandi ububi bwo kwinjiza abana mu gisirikare”.

Umuryango ‘Romeo Dallaire Child Soldiers Initiative’, uritegura gushyira ikigo cyawo mu Rwanda, kizajya gifasha ibihugu byo mu karere gukumira iyinjizwa ry’abana mu gisirikare.