Uyu mukecuru, yatangaje ko kuba inzu ye yahiye byatewe n’umwana we witwa Ndagijimana Emmanuel waraye atajimije umuriro mu cyumba bacanamo mu nzu, nuko bazinduka bagenda, umwana ajya ku ishuli ndetse na nyina ajya guhinga.

Nyuma abaturanyi babonye inzu iri gushya nuko bahita bica urugi bagerageza kuzimya uruhande rutari ruto rwari rwamaze gushya.

Amategura y’icyumba yarahiye, ndetse na bimwe mu bikoresho byari byegereye urwo ruhande birangirika.

Abaturanyi b’uyu mukecuru bavuga ko akeneye ubufasha kuko usibye kuba nta bushobozi afite bwo kuba yakwisanira iyi nzu ashobora kuba afite n’ikibazo cy’uburwayi bwo mu mutwe akaba ari n’umupfakazi.

Uyu mukecuru nawe yivugira ko atishoboye ndetse ko yabuze n’uburyo bwo kujya mu bwisungane mu kwivuza kandi akaba atarashyizwe mu bagomba gufashwa.

Ntitwabashije kuvugana n’ushinzwe imibereho myiza muri aka kagari ngo atubwire niba uyu muntu ikibazo cye kizwi, ariko abandi bayobozi bari aho biyemeje kumukurikirana.

Iyi nzu iherereye mu nsi y’umuhanda ugana mu murenge wa Kibirizi hepfo gato y’ihuriro ry’imihanda igana i Muganza ndetse na Kibirizi.

Clarisse Umuhire