Ubuyobozi bw’akarere ka Gicumbi bwahagurukiye gushishikariza abaturage kuvugurura inyubako zabo mu rwego rwo kujyana n’inyubako zigezweho ziberanye n’umujyi.

Umuyobozi w’akarere ka Gicumbi, Mvuyekure Alexandre, ari kumwe n’abayobozi b’inzego zitandukanye kuri uyu wa 14/5/2013 basuye Akagari ka Gacurabwenge ari na ko zingiro ry’umujyi wa Byumba abashishikariza kuvugurura inyubako zitajyanye n’umujyi.

Kayumba Emmanuel ushinzwe ubuzima mu Karere ka Gicumbi akaba akurikirana ibirebana n’isuku yerekanye ko inyubako zigomba kuba zigaragiwe n’indabo z’ubwiza, ubusitani bujyanye n’icyerekezo turimo, inzugi zo kumarembo y’ibipangu, n’ibipangu bikoze neza byubakishije amatafari akoze mu isima.

Yasabye abaturage kurangwa n’isuku mu mujyi ndetse bagashishikarira gutura bakurikije igishushanyo mbonera cy’umujyi wa Byumba.

Umuyobozi w’akarere ka Gicumbi, Mvuyekure Alexandre, yabashishikarije kuvugura umujyi akaba yabasabye ko abadafite amafaranga bagana amabanki akabaha inguzanyo yo kubaka abatabishoboye bagafashwa kubona aho batura inyuma y’umujyi.

Avuga ko hateganijwe gutuzwa mu mudugudu wa Rwasama n’ahandi ariko bakava mu mugi. Yasabye ubufatanye n’inzego z’ibanze kugira ngo isuku n’iterambere ry’umujyi wa Gicumbi birusheho kwihuta.

Muri iki gikorwa cyo gusura aka kagari kagize igice kinini cy’umujyi basenye bimwe mu bipangu byari bigikozwe n’ibiti ndetse n’imbingo mu rwego rwo kubashishikariza kuvugurura aho batuye ndetse no kurushaho kubumvisha ko batuye mu mujyi atari mu cyaro ko bagomba kugira ishyaka ryo kuwuteza imbere.

Abacuruzi bo mu mujyi wa Byumba nabo batangaza ko basabwe gukora neza imbere y’amaduka hashyirwaho amapave kugirango bakomeze gufatanya n’akarere guhindura isura y’umugi nyuma y’uko akarere kari kubaka umuhanda w’amabuye ufite uburebure bwa km 3 muri uyu mujyi.

Ernestine Musanabera