Igishushanyo mbonera kigaragaza uko Gare ya Gakenke izaba iteye

Mu kibuga gito cyane gikikijwe n’amaduka gikora ku muhanda wa kaburimbo Musanze-Kigali, muri centre ya Gakenke, abagenzi bagaragaza ko bigoranye kuba wabona ibyibanze uhategerereje imodoka akenera nk’aho kwicara, ubwiherero n’ibindi ni cyo cyifashishwa nka gare ya Gakenke.

Ntakirutima Stanislas, agira ati: “Abagenzi n’ibinyabiziga tuba tubyiganira muri kino kibuga bigaragarira buri wese ko ari gito. Muri iki gihe cy’imvura rero ho uretse kuba tuza tukayikinga aha ku mabaraza y’amaduka nta handi wabona ho kuyugama. Umuntu ashobora gutegereza imodoka nk’amasaha atatu ntaho kwicara afite, kandi urebye ukuntu zihaparika zihagika mu zindi nabwo bisaba abantu gushishoza kuko urebye nabi zanagukandagira. Dukeneye gare twajya dutegeramo mu buryo bwisanzuye”.

Kuba santere y’ubucuruzi ya Gakenke ifatwa nk’igice cy’umujyi binagaragarira amaso ko ijyenda yaguka mu rwego rw’imiturire n’abahagenda ni nako ubwiyongere bw’abagenzi baba bakeneye kujya mu byerekezo binyuranye nka Kigali cyangwa i Musanze no mu Mirenge ikagize baba ari benshi. Izo ngendo bakazikora bifashishije imodoka, moto cyangwa amagare.

Izaba ari Gare yujuje ibyangombwa byose nkenerwa mu korohereza abagenzi

Si abagenzi gusa kuko n’abatwara ibyo binyabiziga kimwe n’abahafite amaduka na bo ngo kuba nta Gare ihari bibabangamira. Icyakora izi mpungenge Umuyobozi w’Akarere ka Gakenke w’agateganyo Niyonsenga Aimé François akavuga ko mu gihe kidatinze zizaba zabaye amateka.

Ati: “Mu bikorwaremezo Akarere ka Gakenke gashyize imbere na Gare irimo kandi bigaragara ko igihe gishize abaturage bagaragaza imbogamizi zo kuba nta yihari ari kinini. Twabanje kurwana no kubarura ibikorwa birimo inzu z’ubucucrizi, n’indi mitungo y’abaturage biri aho izubakwa, ubwabyo bifata Miliyoni zisaga 350 z’amafaranga y’u Rwanda. Nanubu gahunda yo kwishyura ingurane irakomeje, tugateganya ko nibirangira gare izahita itangira kubakwa”.

“Rwiyemezamirimo uzayubaka ndetse na Jali Investment Ltd twamaze kwiha igihe ntarengwa cyo kuba imirimo yo kubaka iyi gare izaba yatangiye bitarenze muri Mutarama 2024”.

Imirimo yo kubaka Gare ya Gakenke iratangira bitarenze muri Mutarama 2024

Urebeye ku gishushanyo mbonera kigaragaza imiterere ya Gare nshya, izaba igizwe n’inyubako bigaragara ko yagutse, izifashishwa n’amakampani atwara abantu nk’ibiro n’aho gukatira amatike, amaduka y’ubucuruzi na za alimentations iyo nzu ikazaba igeretse inshuro imwe kandi ifite n’ikibuga cyisanzuye gikikijwe n’uruzitiro kizajya cyifashishwa mu guparikamo imodoka.

Icyakora ibijyanye n’ingengo y’imari izashorwa mu mushinga wo kuyubaka yo ntiratangazwa.

Ahafatwa nka Gare y’ubu bigaragara ko habangamiye abagenzi kuko hashyizweho mu buryo bwo kwirwanaho

MENYA UMWANDITSI

Ishimwe Rugira Gisele

Umunyamakuru

Reba inkuru zose nanditse ( 981 )