Gakenke: Ikiraro cyahuzaga Taba na Rutenderi cyaracitse ubuhahirane burahagarara

Abaturage bo mu tugari twa Taba na Rutenderi mu Murenge wa Gashenyi, Akarere ka Gakenke, bahangayikishijwe n’uko ubuhahirane hagati y’utwo tugari twombi n’utundi byegeranye, bumaze iminsi bwarakomwe mu nkokora, bitewe n’ikiraro cyasenyutse, ubu bakaba bari mu bwigunge.

Aho cyahoze ubu nta kimenyetso na kimwe kigaragaza ko higeze ikiraro
Aho cyahoze ubu nta kimenyetso na kimwe kigaragaza ko higeze ikiraro

Icyo kiraro cyari cyubakishijwe ibiti, byari bishaje, bigera ubwo gisenyuka burundu. Nyamara ngo cyanyurwagaho n’umubare munini w’abaturage, barimo abakenera serivisi z’ubuvuzi, uburezi, ubuhinzi n’ibindi bikorwa binyuranye uduce twombi duhuriyeho.

Ubu abanyeshuri baturuka mu Kagari ka Taba, bajya kwiga ku Ishuri Ribanza rya Rutenderi (EP Rutenderi), abajya kwivuriza ku ivuriro rya Rutenderi, ndetse n’abahinga mu gishanga cya Gashenyi, kimwe n’izindi ngeri zinyuranye z’abaturage bajyaga bakinyuraho, bahamya ko gusenyuka kwacyo byabashyize mu bwigunge bukaije.

Uwitwa Bizumuremyi Alexandre, agira ati “Ubu kuba tutakibona uko twambuka uriya mugezi wa Base tunyuze mu gace icyo kiraro cyahozemo, biratubangamiye cyane. Abana bacu kujya cyangwa guturuka ku ishuri, bibasaba kujya kunyura inzira za kure, ku buryo bahora bacikanwa n’amasomo mu masaha ya mu gitondo. Bamwe muri bo hari n’ubwo biyiba, bagaca ababyeyi n’abarimu mu rihumye, bakambuka uwo mugezi bajabagira mu mazi ngo badakererwa; ku buryo rwose ubuzima bwabobuba buri mu kaga gakomeye”.

Akomeza ati “Ikiraro kigihari umuntu yararwaraga, kumugeza ku ivuriro ntibigorane kubera ko ari yo nzira ya bugufi. Hari abahinga mu gishanga kinini gihuriweho n’utugari twa Taba na Rutenderi, beza ntibabone uko bambutsa umusaruro ngo bawugeze ku bwanikiro n’ubuhunikiro twubakiwe muri utwo duce. Ugiye kureba abaturage twese, bitewe n’aho umuntu ashaka kwerekeza, bidusaba kujya kuzenguruka, urugendo twakoraga mbere ikiraro kikiri kizima rutarengaga iminota 20, ubu turimo kuhagenda hagati y’isaha imwe n’igice n’amasaha abiri”.

Icyifuzo cy’abakoreshaga icyo kiraro, ni uko ubuyobozi bwabubakira ikiri ku rwego rukemura ikibazo cy’ubuhahirane mu buryo burambye, dore ko n’icyo cyangiritse kitaracika burundu, ngo bahoraga bagisanasana, biturutse ku kuba imvura yarajyaga igwa ari nyinshi, ikuzuza umugezi wa Base, ukacyuzurana, bikakiviramo kwangirika.

Zirimwabagabo Théophile agira ati: “Kwangirika kw’iki kiraro, bisa n’aho byahagaritse imibereho ya benshi. Ubu aho bigeze ubuyobozi nibwo duhanze amasomo ku kuba bwatubonera igisubizo cyihuse. Turifuza ko bushakisha igisubizo kirambye cy’iki kiraro, kitari icyo duhora twunamyeho, ngo turasanasana bya hato na hato nk’uko byagendaga ku cyahahoze. Ubuyobozi nibudukize guhora duhangayikiye ubuzima bw’abana bacu n’abarezi babo bahora bahanyura bajya ku mashuri; bunadufashe kudahangayikira ubuzima bw’abarwayi n’abaganga, abahinzi n’abandi bantu, bajye bahanyura bizeye umutekano usesuye”.

Umuyobozi w’Akarere ka Gakenke, Nizeyimana Jean Marie Vianney, yizeza abaturage ko mu kwezi kumwe, bazaba bubakiwe ikindi kiraro.

Yagize ati “Mu bigaragara koko, kiriya kiraro cyahungabanyije ubuhahirane bw’abaturage. Duheruka no kohereza ba enjeniyeri aho cyahoze, ngo baturebere ibyaba bikenewe by’ibanze, dutangire tubyegeranye tugitunganye. Twizeza abaturage ko mu gihe kitarenze ukwezi kumwe, ikiraro kizaba cyasubiyeho, bakongera kujya bahanyura”.

Ngo ikiraro kigiye kuba kihubatswe, kizaba giciriritse kandi cyubatswe mu buryo bw’agateganyo, kuko ikijyanye n’igihe Akarere gateganya kuzacyubaka mu ngengo y’imari y’umwaka utaha nk’uko Mayor Nizeyimana yakomeje abivuga.

Ati “Turateganya kuba twubatse ikiraro giciriritse abaturage baba bifashisha, mu gihe dutegereje kuzubaka ikijyanye n’igihe duteganya mu ngengo y’imari y’umwaka utaha, kuko cyo kucyubaka bisaba ingengo y’imari yihariye tudafite ubu. Gutanga amasoko nabyo byadusaba ikindi gihe kandi nyamara abaturage bagikeneye mu buryo bwihutirwa. Niyo mpamvu turaba dushyizeho icyo cy’agateganyo kugira ngo ubuhahirane bukomeze”.

Muri iki gihe hagitegerejwe ko abaturage bubakirwa icyo kiraro, uyu muyobozi yabasabye kuba bakoresha inzira nyabagendwa zidashyira ubuzima bwabo mu kaga.

kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka