Uyu musaza Rucyema ngo yazize gutoragura abakobwa b’abatutsikazi mu bihe by’abacengezi akabafata neza ubundi abacengezi bahageze bamutera ibyuma mu muhogo.

Ku bw’amahirwe ariko yaje kujyanwa mu Bitaro bya Ruhengeri aravurwa aho yashakiwe ubundi buryo bwo guhumeka kuri ubu akaba asigaye ahumekera mu muhogo.

Mu ijwi rye ridasohoka neza kubera ko aba arimo kurwana no gukurura umwuka, Rukema ati “Nari resiponsabure maze baraza bankubita ibyuma, icyo nazize ni uko hari abakobwa b’abatutsikazi natoraguye mbafata neza barabanziza.”

Uretse kuba abacengezi baramuteye ibyuma mu muhogo, ngo nyuma baje kumwicira umugore gusa kuri ubu akaba yarashatse undi bamaze kubyarana abana batatu.

Nyuma yo kuvurwa agakira, Rucyema yakomeje kugenda afashwa bitandukanye kuko uretse mituweri atangirwa n’akarere yanahawe inkunga y’amafaranga na Perezida, Paul Kagame, akaba avuga ko yamufashije kuko yaguzemo isambu.

Si Rucyema gusa abacengezi bari baribasiye muri kariya gace kuko banamugaje uwitwa Pascal Rwajekare, na we wo mu Kagari ka Rurembo, uvuga ko yakubiswe inkoni mu misaya no mugongo ku buryo kugeza n’uyu munsi bijya bimugaruka.

Ati “Njyewe barankubise, bankubita inkoni itambitse muno mu menyo baraza bankubita indi itambitse mu mugongo ubu ntabwo mbona ubunyeganyega iyo umugongo wamfashe mbura n’ubuhinduka.”

Gusa ngo muri rusange abacengezi basigiye abaturage batuye muri kano karere isomo rikomeye ku buryo badashobora kwongera gukorana na bo kubera ubugome bw’indengakamere bababonanye.

Umunyamabanga nshingwabikorwa w’umurenge wa Rusasa Venuste Bizimana, avuga ko uyu musaza yatewe ibyuma n’abacengezi bamuziza ko yari umunyamabanga nshingwabikorwa w’akagari.

Icyo gihe iwabo habaga umwana w’umukobwa wari warahishwe n’umukazana we mu gihe cya Jenoside , ariko nyuma uyu mwana w’umukobwa yaje gusubira iwabo

Abdul Tarib