Amakuru yashyizwe ahagaragara n’Ikigo cy’Igihugu cy’ubuzima (RBC), avuga ko iyo imbwa ikurumye ako kanya uhita woza igisebe iminota 15 itarashira, hanyuma ugahita wihutira kujya no kwa muganga.

Umuyobozi w’ishami rishinzwe kurwanya indwara zititaweho mu kigo cy’Igihugu cyita ku Buzima (RBC), Dr Jean Bosco Mbonigaba, avuga ko indwara y’ibisazi by’imbwa iri mu ndwara zititaweho, bikaba ariyo mpamvu harimo gukorwa ubukangurambaga kugira ngo abantu bamenye izi ndwara ndetse banazirinde.

Ati “Mu butumwa dutanga tugaragaza izi ndwara zititaweho tukerekana uko zirindwa n’uburyo zivurwa, ariko cyane cyane tukabwira abantu ububi n’ubukana bwazo kandi ko iyo zitavuwe neza zishobora guhitana ubuzima bw’abanatu”.

Dr Mbonigaba avuga ko mu ndwara zititabwaho harimo n’iyo kurumwa n’imbwa, bityo mu bukangurambaga bwo kurwanya indwara zititaweho nayo yagarutsweho, uburyo umuntu ashobora gufashwa ndetse n’ibyo we yakwikorera by’ibanze, kugira ngo yirinde ubwo burwayi aterwa no kurumwa n’imbwa.

Mutuyimana Donata waganiriye na Kigali Today, asanga hari hakwiye kubaho guhugura abantu, uko bamenya uburyo bwo kurwanya izi ndwara zititaweho.

Ati “Nk’ikibazo umbajije cy’uko nzi ko iyo nogeje igikomere ntarwara iriya ndwara, ntabyo nari nzi ahubwo ndasaba inzego z’ubuzima kujya bahugura abajyanama b’ubuzima, hanyuma nabo bakadufasha nk’abaturage”.

Indwara zititaweho iziganje mu Rwanda ni ubuheri, kurumwa n’inzoka, kurumwa n’imbwa, inzoka zo mu nda, Tenia, indwara iterwa n’inzoka ya Bilariziyoze, Imidido ndetse na Cysticercose.

MENYA UMWANDITSI

Ernestine Musanabera

Umunyamakuru

@ musanatines

Reba inkuru zose nanditse ( 1672 )