Ibi biri mu butumwa abakora umurimo w’ubwubatsi bahawe n’abakuriye ihuriro ryabo ku rwego rw’igihugu, kuri uyu wa 26/04/2013, ubwo basuraga ihuriro ry’abubatsi bo mu karere ka Rwamagana, bakaganira ku ngamba zo kwiteza imbere no guteza imbere akarere bakoreramo.

Umunyamabanga w’impuzamahuriro y’abakozi mu Rwanda (CESTRAR), Biraboneye Africain, yabwiye abubatsi basaga 600 bari bahuriye i Rwamagana ko bakwiye guharanira kuba abakozi beza bakorera igihugu, cyane cyane bagaharanira kugirirwa icyizere n’abaturage bakorera kandi ngo ibi bizagerwaho nibakora neza kandi bakajya basohoza imirimo bahabwa n’abo bubakira.

Umuyobozi w’akarere ka Rwamagana, Nehemie Uwimana, yasabye abo bubatsi barimo benshi bakiri mu cyiciro cy’urubyiruko gukora bateganyiriza igihe kiri imbere, bagakunda umurimo bakawukora neza kandi bakamenya gucunga neza amafaranga bavana mu kazi kabo.

Uwimana yagize ati “Amafaranga mukorera ntakwiye kuba ayo kujyana mu bikorwa bitazabagirira akamaro mu gihe kiri imbere.”

Abubatsi bahuriye mu ihuriro STECOMA, aho ngo baba bagamije guhura bakajya inama ku bibazo n’imbogamizi bahura nabyo mu kazi kabo, kandi bagakora ubuvugizi rusange aho bibaye ngombwa hose.

Alphonse Karangwa ushinzwe ibibazo by’abubatsi muri STECOMA yabwiye Kigali Today ko bashaka kuvugurura imikorere n’imyitwarire ya bamwe mubo bahuriye muri syndicat, bakaba abakozi b’abahanga kandi badatakariza abagana n’abo bakorana icyizere.

Iyi nama yabereye ahitwa ku kibuga cya Polisi i Rwamagana, aho abubatsi banahawe umwambaro mushya uzajya ubaranga aho bari hose mu kazi.

Basabwe kuba urugero mu bandi baturage, bakitabira gahunda z’iterambere, imiryango yabo ikitabira ubwisungane mu kwivuza kuko baba bashobora gukomerekera mu kazi igihe icyo aricyo cyose, ariko bakanateganyiriza imiryango uko yakwivuza igihe yarwaye.

Impuzamahuriro y’abakozi (CESTRAR) yateguye iki gikorwa muri gahunda yo gusura abakozi banyuranye hirya no hino mu gihugu bashishikariza abakoresha gushyiraho uburyo bworohereza abakozi gukorera ahantu hatabatera indwara n’inkurikizi ku buzima, abakozi nabo bagasabwa kwitwararika ibyabahungabanyiriza ubuzima kandi bakitabira ubwisungane mu kwivuza.

Muri iyo nama kandi abubatsi bahawe umwambaro wuzuye bazajya bakoresha mu kazi kabo urimo isarubeti, inkweto zabugenewe, ingofero igenewe abubatsi n’akarindantoki byose byo kubafasha gukora banakingiwe umutekano n’ubuzima bwabo.

Ahishakiye Jean d’Amour