Guverineri Bosenibamwe yatangaje ibi ubwo yasuraga akarere ka Burera, tariki ya 26/11/2014, akifatanya n’abaturage bo mu murenge wa Cyeru mu muganda wo gusana ikiraro.

Uyu muyobozi w’intara y’amajyaruguru abwira abanyaburera ko Abanyarwanda babereyeho kubaho neza ngo ni ngombwa ko rero ko ababa bakiri mu mashyamba ya Kongo batahuka bakaza mu rwababyaye.

Agira ati “Namwe muri mwebwe uwaba ufite umwana uri hakurya hariya, ukiri muri ariya mashaymba ya Kongo, mubatelefone, batahe. Uwo ariwe wese wataha rero mwatubwira, tukajya kumwakira…Ntabwo abanyarwanda babereyeho kugwa ku gasi! Abanyarwanda babereyeho kubaho neza! Ntabwo Imana yigize ituraga umuvumo, imiruho. Imana yaturaze ibyiza!”

Si ubwa mbere Guverineri Bosenibamwe asaba abaturage bo mu karere ka Burera gushishikariza abari muri Kongo gutaha kuko no mu kwezi kwa 04/2014 ubwo yagiranaga inama y’umutekano n’abaturage bo mu murenge wa Gahunga, yabibasabye.

Avuga ko hari amakuru agaragaza ko abenshi mu bakiri muri FDLR mu mashyamba ya Kongo, banangiye gutaha, baturuka mu cyahoze ari Ruhengeri, icyahoze ari Gisenyi ndetse n’icyahoze ari Kibuye.

Ngo ibyo byerekana ko no mu karere ka Burera haba hari abafite abavandimwe cyangwa abana babo bakiri muri Kongo baranze gutaha, bari muri FDLR cyangwa baragoswe nayo ikababuza gutaha.

Guverineri Bosenibamwe akomeza avuga ko abo bakiri mu mashyamba ya Kongo badakwiye gutinya gutaha kuko abenshi bamaze gutahuka kandi abo bose bafashwe neza aho basubijwe mu buzima busanzwe abandi nabo bagashyirwa mu nkeragutabara.

Norbert NIYIZURUGERO