Bugesera: Abaturiye uruganda rutunganya amazi rwa Kanzenze barishimira ko batazongera kuyabura

Abaturage bo mu Karere ka Bugesera baturiye uruganda rutunganya amazi rwa Kanzenze, baravuga ko bishimira ko kuva rwatangira gukora babonye amazi meza.

Kimwe mu bice bitunganyirizwamo amazi mu gihe avanywe mu mugezi w
Kimwe mu bice bitunganyirizwamo amazi mu gihe avanywe mu mugezi w’Akagera

Abishimira kugerwaho n’amazi meza ni abo mu Murenge wa Ntarama, bavuga ko mbere y’uko uru ruganda rutangira gukorera mu mwaka ushyize, bahuraga n’ibibazo byo kubura amazi meza, kuko bakoraga urugendo ruri hejuru y’ibilometero bitanu bagiye kuyashaka, kandi bakayabona abahenze kuko ijerekani bayiboneraga Amafaranga y’u Rwanda ari hejuru y’ijana.

Kutagira amazi byatumaga abatuye mu Murenge wa Ntarama, bahura n’ibibazo by’indwara zikomoka ku mwanda, zirimo kurwara no kurwaza inzoka.

Alphonse Habarurema wo mu Kagari ka Kanzenze muri uwo murenge, avuga ko mbere yo kubona amazi meza byabagoraga kuko byasabaga kwiyambaza igare, ku buryo ijerekani bayiguraga amafaranga 300.

Ati “Amazi twayakuraga i Nyamata mu Mujyi, ugereranyije harimo nk’ibilometero 5, ugiye gushaka amazi kuyabona byadutwaraga amasaha atatu, ariko ubu buri muturage arayafite, byatumye isuku yiyongera, kuko mbere ntabwo twafuraga, ariko ubu tugafura, tukanywa amazi meza mu buryo bwo kugira ubuzima buzira umuze”.

Iyo amazi akuwe mu mugezi w
Iyo amazi akuwe mu mugezi w’Akagera arasukurwa akabona koherezwa mu baturage

Mugezi we witwa Honorine Mukanzige ati “Amazi baduhaye yatugiriye akamaro cyane, kuko ataraza twavomaga ibiziba, umuntu yajyagamo hasi akadaha, twavomaga ahantu bita Bunogo mu gishanga. Ubu nta nzoka tukirwaza abana kuko basigaye banywa amazi meza, gufura nta kibazo bidutera, kandi tukayabonera igihe tutiriwe tuvunika”.

Umukozi ushinzwe ubuziranenge, ubuzima ndetse n’umutekano mu ruganda rutunganya amazi rwa Kanzenze (Kigali Water), Valens Nsengiyumva, avuga ko n’ubwo amazi bakoresha bayakura mu mugezi w’Akagera, ariko badakoresha atemba, ahubwo bacukura bagakoresha avuye munda y’ubutaka kuko haricyo byongera ku mwimerere wayo.

Ati “Ni amazi meza yoroshye kuyatunganya kurusha atemba, binarinda kwangiza ibidukikije, kuko ushobora kuyobya amazi y’umugezi, ugasanga wawukamije cyangwa ingano yayo iragabanutse, cyangwa ibinyabuzima birimo bikagenda ntibikomeze kuhakurira. Ni ingezi rero cyane gukoresha uburyo bwo gucukura hagakoreshwa avuye munda y’ubutaka”.

N’ubwo ariko abatuye mu Murenge wa Ntarama bishimira ko babonye amazi meza, siko bimeze kuri bagenzi babo bo mu mirenge ya Mwogo, Juru ndetse na Rweru, bavuga ko bafite ikibazo gikomeye cyo kutagira amazi, bityo bikaba biviramo bamwe guhora barwaye ndetse banarwaje indwara ziganjemo inzoka.

Amwe mu matiyo anyuramo amazi mu gihe arimo gutunganywa
Amwe mu matiyo anyuramo amazi mu gihe arimo gutunganywa

Ubuyobozi bw’Akarere ka Bugesera buvuga ko uruganda rw’amazi rwa Kanzenze rubafasha kubona 50% gusa y’amazi bakeneye mu karere kose, gusa ngo n’abatarayabona bashonje bahishiwe kuko umwaka wa 2024 uzajya kurangira bose yarabagezeho.

Uruganda rutunganya amazi rwa Kanzenze rufitiye akamaro kanini Akarere ka Bugesera, nk’uko Umuyobozi wako, Richard Mutabazi abisobanura.

Ati “Icyo rutumariye cya mbere ni uko ruduha amazi abaturage bacu bakoresha, kuko twari dusanzwe dufite make, turwitezeho ko bizakemura ikibazo cy’isuku n’isukura, kuko ayo mazi ruduha ku munsi metero kibe (m3) 10.000, navuga ko ari 50% y’amazi dukenye mu karere. Icyo turimo turakora ubu ni imiyoboro igeza amazi henshi hashoboka”.

Uruganda rw’amazi rwa Kanzenze, rufite ubushobozi bwo gutunganya metero kibe ibihumbi 40 ku munsi, angana n’ibihumbi 30 yoherezwa mu Mujyi wa Kigali, mu gihe izindi ibihumbi 10 ziguma mu Karere ka Bugesera.

ADVERTISEMENT
rkad1
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka